BJZQ-nyń Almaty qalalyq fılıalynda kelýshiler sany sońǵy úsh aı ishinde rekordtyq kórsetkishke jetken. Qor uıymdastyrǵan «Ashyq esik kúnine» 600-den astam salymshylar, alýshylar men zeınetaqy salasy týraly keńirek bilgisi kelgen basqa da azamattar qatysty.
Qor jetekshiligi jurtshylyqtyń bul sharaǵa degen qyzyǵýshylyn eskere otyryp, Ashyq esik kúnin dástúrli sharaǵa aınaldyrýdy sheship otyr. Bir jarym jyl ishinde Ashyq esik kúnine 20 myńnan astam adam qatysty. Bul joly qor qyzmetkerleri sharaǵa qatysýshylardy zeınetaqy jarnalarynyń túrlerimen jáne jeke zeınetaqy shotynyń jaı-kúıi týraly aqparat alý ádisterimen tanystyrdy.
Qazirgi tańda Qazaqstanda zeınetaqy jarnalarynyń 3 túri bar. Mindetti zeınetaqy jarnalary azamattardyń, mindetti kásibı zeınetaqy jarnalary jumys berýshiler tarapynan zııandy jaǵdaıda jumys isteıtin jumyskerlerdiń esebine aýdarylsa, úshinshi- erikti zeınetaqy túrleri óziniń zeınet jasyn josparlap, qarttyq shaqtaǵy qajettilikterine qarajat jınaýǵa nıetti azamattarǵa arnalǵan.
Salymshylar úshin ózderiniń jeke zeınetaqy shottarynyń jaı-kúıi týraly bilip otyrý da mańyzdy. Búginde bul týraly bilý úshin Qor keńsesine barý nemese dástúrli poshta baılanysymen paıdalaný mindetti emes. BJZQ-da kóptegen qyzmet túrlerin elektrondyq servıster arqyly alýǵa bolady. Bul baǵytta jasalǵan alǵashqy qadam elektrondyq poshta bolsa, qazir BJZQ salymshylary men alýshylary- www.enpf.kz saıty jeke kabınet ashýyna bolady nemese «e-mail-ge JZSh-dan úzindi –kóshirme alý» qyzmetimen; Android, iOS (iPhone, iPad) operasııalyq júıelerine arnalǵan ENPF mobıldi qosymshasymen paıdalana alady. Al «Sıfrly Qazaqstan» ulttyq baǵdarlamasy elektrondyq qyzmet múmkindikterin keńeıte tústi. EGOV.KZ elektrondyq úkimetiniń portaly arqyly da Qor qyzmetterin qoldanýǵa bolady.
Ashyq esik kúni týraly pikirimen sharaǵa zeınetaqy shotynyń jaı-kúıin bilgisi kelgen ájesin ákelgen Nurlan esimdi jigit: «Zeınetaqy qorynyń jumysyn men eskishe túsinetinmin. Al búgin munda zamanaýı tehnologııalar jan-jaqty engizilgenin kórip, tańdanyp qaldym. Endi ájeme olardy qoldanýǵa kómektesemin. Úıde sháı iship otyryp-aq qyzmet alatyn bolady».
Aıdarbek esimdi taǵy bir qatysýshy jaýapkershiligi shekteýli seriktestikte qyzmet etedi eken. «Men zeınetaqy shotym týraly aqparatty elektrondyq poshta arqyly alyp otyramyn. Sońǵy úzindi-kóshirme kelgende, jumys berýshi jarnamdy ýaqytyly aýdarmaǵanyn, biraq buny bizden jasyrǵanyn túsindim. Búkil mekemedegi jaǵadı osyndaı bolyp shyqty. Bizdiń talabymyzdan keıin jarna aýdaryldy. Endi men qor saıtynda jeke kabınet ashyp, jaǵdaıdy árdaıym qadaǵalap otyrmaqpyn. Basqalarǵa da osyndaı keńes berem. Internet arqyly qyzmet alýdyń esh qıyndyǵy joq, ári yńǵaıly».
2017 jyldyń qorytyndysy boıynsha BJZQ operasııalarynyń 52 paıyzy elektrondyq ádispen kórsetilgen. Qordyń korporatıvtik strategııasyna saı, 2021 jyly bul kórsetkishti 60 paıyzǵa jetkizý kózdelgen.
Daıyndaǵan Aınash ESALI,
«Egemen Qazaqstan»
ALMATY