«Hat qorjyn»

...rızashylyǵyn jetkizedi

Aýylyna qaıyrymdylyq jasady

Qurǵaq jerde dán óspeıdi, qurǵaq sózden eshteńe ónbeıdi. Bir azamatymyz óziniń azyn-aýlaq nesibesinen bólip, aýylynyń jıyn-toı ótkizýine jaǵdaı jasaý maqsatynda Ekibastuz qalasynan 10 bıik ústel, árbir ústel basyna 12 adamnan otyratyn oryndyq, úlken kıim ilgish jasattyryp jáne gaz plıta balondaryn ákelip aýyldyń klýbyna tabystady. 

 Buny óz nesıesine jasatqan jáne kólik jaldap aýylǵa ákelgen aýylymyzdyń moldasy bolǵan Ǵubaıdolla atamyzdyń nemeresi Esengeldi Baıdyrahmanuly bolatyn. Ol ózi Astanada turady, zeınetker. Bundaı jaqsylyq bireýlerge qarlyǵashtyń órt sóndirýge qanaty­men sý sepkendeı bolyp kórinýi múmkin. Al bul Ábjan aýy­lynyń turǵyndary úshin úlken jaqsylyq. О́ıtkeni buryn toı ja­saýǵa adamdar búkil aýyldan ústel, tósenish, oshaq, qazandyq tasyp bir kún ýaqyttaryn ótkizetin. Mine, naǵyz patrıot dep osyndaı azamattardy aıtar bolar. 

Qaıyrgeldi MAShYRYQULY Pavlodar oblysy, Aqtoǵaı aýdany

...súıinishin bildiredi

Qulaq quryshyn qandyrady

Burynǵydaı emes, zeınetke shyqqaly beri bos ýaqytym molaıyp, gazet pen jýrnal, kitaptar oqyp, radıo tyńdaýǵa kóbirek múmkin­dik týdy. Ult muratyn ulyqtaǵan Qazaq radıosyn táýlik boıy tyńdaı­tyndardyń sanatynanmyn. Jas kezimizden ermegimiz radıo bolatyn. 

Qazir tranzıstorly radıoqabyldaǵysh ustaıtyn boldyq. Keıinnen úıdegi japonnyń «Sonı» ámbebap radıoqabyldaǵyshy turaqty serigimizge aınaldy. Osylaısha oǵan ábden baýyr basyp kettik. Kún demeı, tún demeı qalaǵan ýaqytyńda túımesin basyp qalsańyz boldy, qulaqtyń quryshyn qandyrady.

Uıqydan oıana salysymen «Kóńildi notadan» qalaǵan ánińizdi tyńdaısyz. «Syrlasý» klýbynyń habarlary júrek qylyn shertedi. «Án salaıyqta» jandy daýyspen aıtatyn ánshimen qosylyp shyrqaı alasyz. Syrshyl aqyn Qalqaman Sarın júrgizetin bir saǵattyq «Qaýyrsyn qalam» habarynyń qalaı ótip ketkenin de bilmeı qalasyz. Al aqyn qyzymyz Názıra Berdalynyń «Poezııa saǵaty» men jýrnalıster Elmıra Álimsarynyń, Ǵalııa Esqulovanyń arnaıy habarlary kóńil kókjıegińdi keńeıtip, ǵajap áserge bóleıdi. Jeksenbi saıyn beriletin «Kóńil kózi» habarynyń áseri tipti ǵajap. Qysqasy, Qazaq radıosyn tyńdańyz, esh ókinbeısiz, aǵaıyn.

Káribaı ÁMZEULY, zeınetker Túrkistan oblysy

...saqtandyrady

Esti sóz eskirmeıdi

Aýyldaǵy bazary mol, baqytty balalyq shaqqa ne jetsin. Tańnyń atysy, kúnniń batysy oıyn qýyp qana qoımaı, qolymyzdan kelgenshe úı sharýasyna da kómektestik. Esimiz ketip, esirip júrgende este qalarlyq sátter de mol boldy. 

Zaman ózgerdi, aýzynan ana súti keppegen, belinen besik taby ketpegenderdiń ózi qazir kompıýter men uıaly telefonǵa, bir sózben aıtqanda gadjetterge úıir. Qyzyq kórip, olardy osyǵan úıretip júrgen de ózimiz emes pe degen oı keledi. Balaly úı bazar emes pe edi. Ý-shý qaldy, typ-tynysh, tipti nemerelerimiz sóıleýden qaldy dese de bolady. 

Mamandardyń aıtýynsha, bos ýaqytyn tek gadjettermen ótkize­tin ba­lalardyń kórý qabiletiniń nasharlaýyna, tiliniń damýyna, sabaq úlgeriminiń tómendeýine, júıkeniń juqarýyna, áleýmettik beıim­delmeýine, ártúrli aýrýlarǵa shaldyǵýyna sebepker bolady eken... 

Fransýz oıshyly Jan-Jak Rýsso kezinde «Balań aqyldy ári esti bolsyn deseń, deni saý, myqty etip ósir. Ol jumys istesin, árekettensin, júgirsin, aıqaılasyn, tynymsyz qımyl ústinde bolsyn», deıdi. Esti sóz ámanda eskirmeıdi.

Sovet HAMITULY, eńbek ardageri Kókshetaý 

...áserimen bólisedi

Jastar jınaǵy jaryqqa shyqty

«Rýhanı qazyna» baǵdarlamasynyń «Týǵan jer» arnaıy jobasy aıasynda Aqtóbe oblysy ákiminiń bastamasymen, mádenıet, arhıvter jáne qujattama basqarmasynyń qoldaýymen, óńirdegi jas talanttardyń «Aq aıdyn» jyr jınaǵynyń tusaýy kesildi. Jınaqty qurastyrǵan S.Jıenbaev atyndaǵy jasóspirimder kitaphanasy. Uzyn sany 62 avtordan prozalyq jáne poezııalyq shyǵarmalar kelip tústi. Olardy ólkelik belgili aqyn-jazýshylar iriktep, 50 avtordyń shyǵarmalaryn tańdap aldy.

Jas talapker aqyndardan Esenbek Jumaǵalıev, Aqtolqyn Nazar­baeva, Aqilgek Myrzabaı, Qazybek Amanjoluly, Mıhaıl Dýd­nık, Jomart Baımuhan, Aınabek Jetkirbaev, Aqnıet Jetkir­baı, Jan­gúl Sembaeva, Nurserik Táýekelov, Aıymgúl Shakı, Qýanysh Tóleý­lıev sekil­di órender jınaqta jarııalanǵan óz shyǵarmalaryn jurt­shy­lyqqa oqyp berdi. 

Kitaphanada turaqty túrde jasaqtalatyn, jergilikti aqyndardyń shyǵarmalary qoıylǵan «О́leń kernep barady júregimdi» atty kitap kórmesi ashylyp, jas aqyndardyń shyǵarmalary nasıhattalady. 

Úrjan QURMANQYZY, S.Jıenbaev atyndaǵy oblystyq jasóspirimder  kitaphanasy dırektorynyń orynbasary Aqtóbe 

...oı qozǵaıdy

Balalardy qýanta bileıik

Balalar úıi kádimgi memlekettik mekeme. Kıim-keshek, azyq-túlikke bólinetin qarajat jetkilikti ári sapaly zattarmen qamtamasyz etilgen. Sondyqtan balalar úıine kıim-keshek, azyq-túlik ákelýdiń qajeti joq. Ákelseńiz olar joq bolyp ketýi ábden múmkin. Mereke kezderinde mundaı dúnıeler tipti kóbeıedi. Al onyń bári ustaǵannyń qolynda, tistegen­niń aýzynda ketedi. Saýap – tamaq berýmen, kıindirýmen shektelmeıdi.

Balalar úıine qaıyrymdylyq jasaǵyńyz kelse, olardy tek qýantyńyz. Múmkindik bolsa kınoteatrǵa aparyp mýltfılm kórsetińiz, bolmasa meıramhanaǵa aparyp tamaqtandyryńyz da arnaıy jerlerge aparyp oınatyńyz. Árıne bul kópshilikpen birigip jasalatyn is. Tipti bolmasa, kelip konserttik is-shara uıymdastyryp beri­ńizder. Jaqsy kóńil kúı syılaý – olarǵa úlken qýanysh. Basqa kóp eshteńe qajet emes. 

Al mynaý qoǵamda qanshama turmysy tómen otbasy bar. Olar kóńil kúı, qýanyshqa kende emes, kerisinshe materıaldyq qajettilikter jetispeıdi. Azyq-túlikti osyndaı otbasylarǵa berseńizder, qýanysh pen shyn yqylasty ala alasyz. Bir orta qýanysh pen kóńil kúıdi qalaıdy, bir orta shyn kómekti qalaıdy. Sony ajyrata bileıikshi...

Nurbol HANAǴAT Almaty