Búginde Áýlıeata jerinde saıabaqtardy qaıta jańǵyrtý jumystary qarqyndy júrgizilip keledi. Naqty aıtsaq, osy ýaqytqa deıin Taraz qalasyndaǵy Baýyrjan Momyshuly atyndaǵy «Jeńis» saıabaǵy qaıta jańǵyrtýdan ótip, Jeńis merekesi qarsańynda el ıgiligine berilgen bolatyn.
Sol sııaqty jýyrda ǵana tarıhı shahar ortalyǵyndaǵy Halyq Qaharmany Qaırat Rysqulbekov atyndaǵy saıabaqty qaıta jańǵyrtý jumystary bastaldy. Búgingi tańda jalpy kólemi 6 gektardy quraıtyn saıabaqty demontajdaý isi júzege asyrylý ústinde. Batyr atyndaǵy saıabaqtan aldaǵy ýaqytta jastarǵa arnalǵan mýzeı, balalar oıyn alańdary, sýburqaqtar men demalys oryndary salynady. Sonymen qatar qymyzhana qurylysy júrgizilip, bul jerde ulttyq sýsynymyz nasıhattalatyn bolady. Al kespe tastardan tóselgen arnaıy joldar saıabaq kórkin arttyra túsetini sózsiz. Sondaı-aq saıabaqtaǵy Qaırat Rysqulbekov eskertkishi jańa sáýlettik úlgide qaıtadan jasalady.
Halyq Qaharmany atyndaǵy saıabaq Taraz qalasynyń Tóle bı dańǵylynda ornalasqan. Bul kóne shahardaǵy negizgi kóshe bolǵandyqtan, munda júretin halyqtyń da qarasy qalyń. Oblys ákimdiginiń habarlaýynsha, Tóle bı dańǵyly boıynda, ıaǵnı Táýke han kóshesinen Sypataı batyr kóshesine deıin túngi jaryqtandyrý shamdaryn zamanaýı shamdarmen aýystyrý jumystary da bastalǵan. Osy ýaqytqa deıin 10 shaqyrymdyq jeliler boıynda 286 eski elektr baǵany men túngi jaryqtandyrý shamdary da aýystyrylǵan. Endi elektr symdary jerastyn úńgirleý arqyly ótkiziletin bolady. Sonymen qatar jerde elektr baǵandary ústimen júrgizilgen elektr symdary joıylyp, jańa jaryq dıodty shamdarmen shahmatty túrde aýystyrylady. Olar árbir 30 metr saıyn ornalastyrylmaq.
Hamıt ESAMAN, «Egemen Qazaqstan»
Jambyl oblysy