Keshe Astanada Aqparat jáne Kommýnıkasııalar mınıstrligi janyndaǵy Qoǵamdyq keńestiń kezekti otyrysy ótti. Jıyn barysynda Aqparat jáne kommýnıkasııalar mınıstri Dáýren Abaev vedomstvonyń Memleket basshysynyń tapsyrmasyna saı atqaryp jatqan jumystaryna toqtalyp, aldaǵy josparmen bólisti.
«Bizdiń jumystyń basty baǵyttarynyń biri halyqpen jáne azamattyq qoǵammen tyǵyz baılanys ornatý. Osy oraıda Qoǵamdyq keńestiń atqaratyn róli úlken mańyzǵa ıe bolyp otyr. О́ıtkeni memlekettik organdardyń ashyqtyǵyna qol jetkizildi. Keńes jumysy bılik pen qoǵam arasyndaǵy baılanysqa arqaý boldy. О́tken jyly Qoǵamdyq keńestiń úsh jınalysyn ótkizdik. Ol jıyndarda «Sıfrly Qazaqstan» memlekettik baǵdarlamasyn daıyndaý barysy pysyqtaldy. «Rýhanı jańǵyrý» baǵdarlamasyn júzege asyrý jáne buqaralyq aqparat quraldary, ashyq úkimet pen memlekettik qyzmet kórsetý salalaryndaǵy birqatar mańyzdy máseleler de qaralǵan bolatyn. Keńestiń árbir usynysy mınıstrliktiń baqylaýynda. Mınıstrliktiń normatıvtik-quqyqtyq aktileri de mindetti túrde Qoǵamdyq keńestiń kelisimi boıynsha júzege asyrylady. «Aqparatty Qazaqstan-2020» memlekettik baǵdarlamasy 5 jyl júrgizildi. Qazirgi ýaqytta óz kúshin joıdy. Memlekettik baǵdarlamanyń sátti júzege asyrylǵany elimizdegi aqparattyq-kommýnıkasııalyq tehnologııalar, memlekettik qyzmet kórsetý men buqaralyq aqparat quraldary salasyna qatysty kórsetkishterdiń jaqsarǵanynan baıqalady. Osy baǵdarlamany júzege asyrý arqyly elimizdegi ekonomıka salasyn sıfrlandyrýdyń kelesi kezeńin damytýǵa baǵyttalǵan bazalyq múmkindikter quryldy. Jospar boıynsha 14 maqsatty ındıkator qarastyrylǵan. Olardyń teń jartysy ıaǵnı jeteýi tolyq júzege asyryldy. Halyqty sıfrly habar taratýmen qamtamasyz etý josparǵa saı 87 paıyzdy quraýy qajet bolatyn. Qazirgi kórsetkish boıynsha 81,1 paıyz. Bul «Qazteleradıo» radıotehnıkalyq stansasy qurylysynyń kesteden keshigip jatqanyna baılanysty. Alaıda jumys bir sátke de toqtaǵan joq. Kórsetkish turaqty túrde ósip kele jatyr», dedi Aqparat jáne kommýnıkasııalar mınıstri.
Baıandama barysynda mınıstr memlekettik buqaralyq aqparat quraldarynyń jumysy da jan-jaqty jańǵyrtylǵanyn tilge tıek etti.
«El arna» kınokanaly ashyldy. «Habar 24» arnasynda robottalǵan stýdııa iske qosyldy. «GalamTV» ınternet-telearnasy jańalandy. 2017 jyly memlekettik aqparattyq tapsyrys aıasynda 40 teleserıal túsirildi. Bul 2016 jylmen salystyrǵanda eki esege artyq kórsetkish. Keıbir otandyq telehıkaıalardy óz elderinde kórsetý quqyǵyn Qyrǵyzstan, Reseı men Qytaı, taǵy basqa elder satyp alyp jatyr. Sonymen qatar «Qýatty Qazaqstan» biryńǵaı medıa-jospary bekitildi. Bul josparǵa saı memlekettik organdardyń bir jyldyq is-sharalary biriktirilip, olardy jarııalaýdyń usynystary belgilendi. О́tken jyldyń jeltoqsan aıynda aqparat jáne kommýnıkasııalar baǵytyndaǵy 16 zań men 6 kodekske ózgertýler men tolyqtyrýlar engizildi. Bul zań jobasyn ózderińizben birneshe ret talqylaǵan bolatynbyz. Qazir zań aqparat keńistiginde bizdiń azamattardyń jáne balalardyń quqyǵyn qorǵaýda oń nátejıe berip otyrǵanyn atap ótý qajet. Buǵan qosa Sıfrly habar taratýǵa kóshý boıynsha daıyndyq jumystary júrgizildi. 2018 jyldyń sońyna deıin Mańǵystaý, Jambyl men Ońtústik Qazaqstan oblystary tolyq sıfrly teleradıohabar taratýǵa kóshedi. Qazirgi ýaqytta spýtnıkti televızııa abonentteriniń kólemi 1,3 mıllıon adamdy qurap otyr», dedi vedomstvo basshysy.
Elimizdiń aqparattyq naryǵyn damytý maqsatynda túrli ımıdjdik is-sharalar da ótkizilip jatyr. Osy oraıda Dáýren Abaev «Tumar» baıqaýyn, «Úrker» syılyǵyn, sonymen qatar «Astana Media week» medıa-aptasyn aıryqsha atap ótti.
«Basa nazar aýdaratyn taǵy bir jaıt, «Rýhanı jańǵyrý» baǵdarlamasy aıasynda bizdiń mınıstrlik «Qazaqstannyń 100 jańa esimi» jobasyn júzege asyrýda. О́zderińizge de belgili, ashyq daýys berý nátıjesinde óz eńbekterimen úlken tabysqa jetken elimizdiń jańa esimderi belgili boldy. О́tken jyldyń 1-shi jeltoqsanynda olar Memleket basshysymen kezdesti. 100 jańa esimniń qoǵamǵa paıdaly jobalary memlekettiń qoldaýyna ıe bolatynyn atap ótkim keledi. Qazir halyq arasynda úlken qoldaýǵa ıe bolǵan osy jobanyń kelesi kezeńine daıyndyq jumystary bastalyp ketti. Sondaı-aq biz «Ashyq úkimet» jobasyna erekshe nazar aýdaramyz. Bul «Aqparatqa qoljetimdilik» zańynyń aıasynda júzege asyp otyr. «Ashyq derekter» portaly arqyly el azamattary 2800-ge jýyq derekke qol jetkizýge múmkindik alady. Sonymen qatar osy portalda 25 myń normatıvtik-quqyqtyq akti men týra sondaı kólemdegi bıýdjettik baǵdarlamalardyń jobalary ornalasady. Kez kelgen azamattyń memlekettik organdardyń birinshi basshylarynyń blog-platformalary arqyly ózin qyzyqtyrǵan suraqtarǵa jaýap alýyna múmkindik paıda boldy. Memlekettik organdardyń birinshi basshylaryna 220 myń suraq kelip túsken. Aqparattyq keńistiktegi zańnyń qadaǵalanýyn qamtamasyz etýge toqtalatyn bolsam, bizdiń basty maqsatymyz – azamattardy ásirese balalar men jasóspirimderdi terrorızm, dinı ekstremızm, zorlyq-zombylyq, sýısıdke ıtermeleý jáne taǵy basqa nasıhattardan qorǵaý. О́tken jyldyń ózinde osyǵan baılanysty 10 myńǵa jýyq saıt pen materıaldarǵa tosqaýyl qoıyldy. Áleýmettik jelilerde 230 myńnan asa materıal joıyldy», dep atap ótti Aqparat jáne kommýnıkasııalar mınıstri.
Raýan QAIDAR, «Egemen Qazaqstan»