Qyzylordada Investorlardy tartý jáne aımaqtyń ınvestısııalyq klımatyn jaqsartý boıynsha óńirlik keńesiniń otyrysy ótti.
Aımaqta ınvestorlar úshin jasalǵan qolaıly jaǵdaıdyń arqasynda aǵymdaǵy jyldyń qańtar-mamyr aılarynda Qyzylorda oblysynyń negizgi kapıtalyna 66 mıllıard teńgege jýyq ınvestısııa tartylyp, kásipkerlerge qyzmet kórsetý prosesi avtomattandyrylǵandyqtan tehnıkalyq sharttardy alý merzimi bir aıdan 3 jumys kúnge deıin qysqardy. Odan bólek, Memlekettik qyzmet jáne sybaılas jemqorlyqqa qarsy is-qımyl agenttiginiń jobasy aıasynda qyzylordalyq kásipkerlerge qyzmet kórsetý ortalyǵynyń negizinde ınvestorlardy sybaılas jemqorlyqqa qarsy qoldaý front-ofısiniń ashylýy josparlanýda.
Qyzylordada oblys ákimi Qyrymbek Kósherbaev, «Qazaq Invest» UK» AQ Basqarma Tóraǵasy Saparbek Tuıaqbaev, «Qazaq Invest» UK» AQ Basqarma Tóraǵasynyń orynbasary Birjan Kaneshev pen múddeli memlekettik organdary basshylarynyń qatysýymen óńirlik Investorlardy tartý jáne Qyzylorda oblysynyń ınvestısııalyq klımatyn jaqsartý jónindegi keńes otyrysy ótti.
Qyzylorda oblysynyń ákimi Qyrymbek Kósherbaev Elbasynyń Joldaýynan týyndaıtyn mindetterdiń biri – ınvestısııalardy ekonomıkaǵa tartý ekenin atap ótip, óńirde ınvestorlar úshin qolaıly jaǵdaı jasaý boıynsha júrgizilip jatqan jumystar týraly aıtty.
«Oblysymyzda barlyq qyzmetterdi bir jerden alýǵa múmkindik beretin biryńǵaı Kásipkerlerge qyzmet kórsetý ortalyǵy jumys isteıdi. Ortalyqtyń jumysy tolyqtaı avtomattandyrylǵan, sondyqtan tehnıkalyq sharttardy usyný merzimi 1 aıdan 3 jumys kúnine deıin qysqardy. Bizdiń tájirıbemizdi basqa aımaqtar da engizýde. Aımaqqa «zákirli» ınvestorlardy tartý maqsatynda 2018 j. qańtar-mamyr aılarynda 11 roýd-shoý uıymdastyrylyp, nátıjesinde sheteldik ınvestorlarmen 3 memorandýmǵa qol qoıyldy», - dedi aımaq basshysy.
2018 j. 5 aıynda negizgi kapıtalǵa tartylǵan ınvestısııalar kólemi 15,4 paıyzǵa ósip, 65,9 mlrd.teńgeni qurady.
Odan bólek, ınvestısııalyq jobalardy júzege asyrý maqsatynda kez kelgen sybaılas jemqorlyq oqıǵalardyń aldyn alý maqsatynda Memlekettik qyzmet isteri jáne sybaılas jemqorlyqqa qarsy is-qımyl agenttigi «Investorlardy sybaılas jemqorlyqqa qarsy qoldaý» jobasy ázirlendi.
«Qyzylordalyq kásipkerlerge qyzmet kórsetý ortalyǵynyń negizinde ınvestorlardy sybaılas jemqorlyqqa qarsy qoldaý front-ofısiniń ashylýy josparlanýda. Jobanyń maqsaty – ınvestorlardy sybaılas jemqorlyq kórinisterinen barynsha qorǵaý. Bolashaqta kez kelgen ınvestor Kásipkerlerge qyzmet kórsetý ortalyǵynda qyzmet alý barysynda sybaılas jemqorlyqqa qarsy qorǵaý paketin de alatyn bolady», - dedi oblys ákimi.
Oblystyq memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Abzal Muhımov osy joba týraly baıandama jasady. Esterińizge sala keteıik, maýsym aıynyń basynda Astanada «Investorlardy sybaılas jemqorlyqqa qarsy qoldaý» jobasy qolǵa alynyp, otandyq jáne sheteldik ınvestorlardy paraqorlyq táýekelderinen qorǵaý jáne ákimshilik kedergilerdi tómendetý sharalaryn júzege asyratyn front-ofıs ashyldy. Bolashaqta mundaı front-ofıster búkil respýblıka boıynsha ashylatyn bolady.
Keńes otyrysy barysynda aımaqta ınvestısııalyq jobalardy júzege asyrýdyń mán-jaıy talqylanyp, oblys ákimdigi men «Qazaq Invest» AQ arasynda áriptestik jónindegi memorandýmǵa qol qoıyldy.