Astana qalasynda bedeldi halyqaralyq sarapshylar orman landshaftaryn qalpyna keltirý jáne Bonn shaqyrtýy negizinde bas qosty. Kezdesýdiń Astanada ótý sebebi, Qazaqstan orman ekojúıesin qalpyna keltirý boıynsha aýmaqtarda ǵana emes, álemde joǵary kórsetkish kórsetip otyr, dep habarlaıdy QazAqparat QR Aýyl sharýashylyǵy mınıstrliginiń baspasóz qyzmetine silteme jasap.
Tutastaı alǵanda sońǵy 10 jylda ormandardy molaıtý kólemi 500 myń gektar aýmaqta júzege asyryldy, bul respýblıkanyń orman jamylǵysyn 0,2% arttyryp, respýblıka aýmaǵynyń 4,7% deıin jetkizýge múmkindik berdi.
1997 jyldan 2018 jylǵa deıingi kezeńde Astana mańynda 80 myń gektardan astam aýmaqqa aǵash otyrǵyzyldy. Bul ormandy landshaftardy qurý jáne qalpyna keltirý boıynsha respýblıkada atqarylǵan jumystyń aıqyn dáleli. 2021 jylǵa deıin Astana qalasynyń aınalasyndaǵy jasyl aımaqty 100 myń gektarǵa jetkizý josparlanyp otyr.
Atalǵan Keńes Halyqaralyq Bonn shaqyrý máselesine oraı Kavkazdaǵy jáne Orta Azııadaǵy ulttyq jáne aımaqtyq kúshterdi arttyryp, 2030 jylǵa qaraı 350 mln. ga astam búlingen jerlerdi qalpyna keltirý boıynsha úılestirýdiń alǵashqy múmkindigin usynady. Keńesti ashqan Premer-Mınıstrdiń orynbasary - Aýyl sharýashylyǵy mınıstri О́mirzaq Shókeev: «Kóptegen elder jerdi qalpyna keltirýde eleýli tabystarǵa qol jetkizdi. Alaıda, qalpyna keltirý shamasyn eskere otyryp, orman jamylǵysyn ulǵaıtý úshin ishki jáne syrtqy resýrstardy jumyldyrý óte mańyzdy. Osylaısha ómir súrý jaǵdaıyn jaqsartýǵa bolady», - dedi.
Kavkaz jáne Orta Azııa aımaǵynda orman landshaftaryn qalpyna keltirý barlyq jer túrlerine qolaıly áser etedi. Atap aıtqanda, eldi mekender men taý-ken ónerkásibi kásiporyndarynyń janyndaǵy ormandardy, orman ańǵarlary men jaǵalyq ormandardy qalpyna keltirýge basa nazar aýdarylýda. Dóńgelek ústelge Ázerbaıjan, Armenııa, Germanııa, Grýzııa, Qyrǵyz Respýblıkasy, Reseı Federasııasy, Tájikstan men О́zbekstannyń orman bólimsheleriniń basshylary, sondaı-aq BUU Eýropalyq ekonomıkalyq komıssııasynyń, Tabıǵatty qorǵaý halyqaralyq odaǵy, Birikken Ulttar Uıymynyń azyq-túlik jáne aýylsharýashylyq uıymynyń (FAO) ókilderi qatysty.