2007 jyly Memleket basshysy Nursultan Nazarbaev óz Jarlyǵymen 23 maýsymdy - Polısııa kúni dep bekitti. Osy jyldan bastap jyl saıyn dástúrli túrle 23 maýsymda ishki ister organdarynyń qyzmetkerleri ózderiniń kásibı merekelerin atap ótýde, dep habarlaıdy Semeı qalalyq ishki ister basqarmasy baspasóz qyzmetiniń jetekshisi Elýbek Ospanov.
Qalyptasqan dástúrge sáıkes búgin Semeı qalalyq IIB májilis zalynda Semeı qalasynyń ákimi Ermak Sálimovtyń, qalalyq máslıhat hatshysy Beısenbek Aqjalovtyń jáne Semeı qalalyq IIB bastyǵy, polısııa polkovnıgi Dýlat Qazaqpaevtyń qatysýymen Qazaqstan polısııasynyń 26 jyldyǵyna arnalǵan saltanatty is-shara bolyp ótti.
Qazaqstan polısııasy kúnine arnalǵan saltanatty jıyn Qazaqstan Respýblıkasynyń gımnimen ashylyp, quttyqtaý sóz basqarma bastyǵy Dýlat Qazaqpaevqa berildi.
-Osydan 26 jyl buryn qabyldanǵan «Qazaqstan Respýblıkasynyń ishki ister organdary týraly» Zań elimizdiń polısııasynyń quqyqtyq mártebesi men uıymdastyrýshylyq qurylymyn rettep, onyń qoǵamdaǵy jáne memleketimizdegi orny men rólin anyqtap berdi,-dedi ol óz sózinde,- Ishki ister organdary damýynyń barlyq kezeńderinde de polısııa qyzmetkerleri eń basty mindet – azamattardyń konstıtýsııalyq quqyqtary men bostandyqtaryn zańsyz qol suǵýshylyqtan qorǵaýdy qamtamasyz etip, qylmysqa qarsy kúreste árqashan aldyńǵy shepte turdy. Qazaqstandyq polısııa úshin osynaý ataýly kúni barshańyzǵa zor densaýlyq, baıandy baqyt, otbastaryńyzǵa yrys-bereke jáne Otanymyz – Qazaqstan Respýblıkasynyń ıgiligi jolyndaǵy qyzmetterińizge tabystar tileımin!
- Jas qyzmetkerlerdi patrıottyq rýhta tárbıeleýge mol úles qosyp jáne bizdiń danqty dástúrlerimizdi saqtaýda ónegelik tanytyp kele jatqan ardaqty ardagerlerimizdiń de orny erekshe,-deıdi Semeı qalalyq ishki ister basqarmasynyń baspasóz jetekshisi Elýbek Ospanov,-búgingi tańda qazaqstandyq polısııa qyzmetkerleri qylmysqa qarsy kúreste basymdy toıtarys berýdi júzege asyrý, elimizdegi quqyqtyq tártipti nyǵaıtý jáne qaýipsizdikti qamtamasyz etý úshin barlyq qajetti jaǵdaılar men múmkindikterge ıe.
Tártip saqshylarynyń kásibı merekesinde júrekjardy lebizin bildirgen qala ákimi Ermak Bıdahmetuly antyna adal, sertine berik polısııa qyzmetkerleri polısııa podpolkovnıgi Radık Saıfýtdınovke, polısııa maıorlary Ernur Tóleýmuhanov, Álııa Bekısheva jáne Ásel Daýletbaevalarǵa arnaıy marapattar tabys etti. Qala ákiminiń alǵys hatymen polısııa aǵa leıtenanty Aıdar Dúısembaev marapattaldy. Sondaı-aq qalalyq máslıhat hatshysy Beısenbek Aqjalov alǵys hatpen taǵy tórt qyzmetkerdi marapattady.
Qoǵamdyq tártipti saqtaýda, óziniń qyzmettik mindetterin adal atqarǵany úshin 28 qyzmetker III dárejeli «Ishki ister organdaryndaǵy minsiz qyzmeti úshin» tósbelgisimen, 28 qyzmetker IIB gramotasymen jáne alǵys hatymen, sondaı-aq 154 qyzmetker aqshalaı syıaqy marapattaldy.
Saltanatty is shara qalalyq estrada juldyzdarynyń jáne talantty polısııa qyzmetkreleriniń daıyndaǵan merekelik konsertimen jalǵasty.
Raýshan NUǴMANBEKOVA,
SEMEI