Baǵanaly orda, basty ordaǵa aınalǵan elorda – táýelsiz el tarıhyndaǵy erekshe beles, aıtýly jetistik.
Kemeldik pen kenendiktiń kórinisi Astana bul kúnde álemniń alyp shaharlarymen teń dárejede. Halqymyzdyń ǵasyrlar boıy qalyptasqan órkenıetin zamanaýı turǵyda jańǵyrtyp, jasampaz jolǵa bastady. Al elordanyń mereıtoıy – halyqtyń qýanyshy, memlekettiń mereıi.
Búginde bas qalanyń aıtýly mereıtoıyn laıyqty deńgeıde ótkizýge daıyndyq jumystary qarqyndy júrgizilýde. Kún saıyn damýdyń jańa satysyna kóterilip kele jatqan Astana shaharynyń sánin keltirip, kórkin arttyratyn jobalar da az emes. Máselen, «Araı-2», «Astana-Arena», sonymen qatar Bógenbaı batyr, Jeńis dańǵylyndaǵy gúlzarlardyń abattandyrylýy qazynaly mereıtoıǵa degen qyzý daıyndyqty kórsetedi. Bul rette árbir óńirdiń elordaǵa degen yqylasy men qurmeti erekshe.
Elorda toıyna áýlıeatalyqtardyń da qosar úlesi qomaqty. Astana qalasyndaǵy «Velosıped kóliginiń ınfraqurylymy» nysanynyń №3 jer teliminde tıisti jumystardy júrgizý Jambyl oblysynyń enshisine tıip otyr. «Shyn máninde Astana toıy – eldiktiń toıy. Osydan jıyrma jyl buryn Arqa tósinen eńse kótergen elordamyzdyń jyl ótken saıyn jasaryp, jaınaı túskenin kórý barsha qazaqstandyqtar úshin úlken mereı, maqtanysh ekeni anyq. Elordamyzdyń álemdik qoǵamdastyq aldyndaǵy bedeli, mártebesi alasarmaýy jolynda ter tógý árbirimiz úshin de abyroıly mindet dep bilemiz», deıdi oblystyq qurylys, jolaýshylar kóligi jáne avtomobıl joldary basqarmasynyń basshysy Ádilet Ahataev.
О́ńirdiń bas qurylysshysynyń aıtýynsha, mundaǵy velosıped kóligi jolynyń uzyndyǵy 12,36 shaqyrym eken. Bul Esil aýdanynyń Dostyq kóshesinen Qabanbaı batyr dańǵylyna deıingi aralyqty qamtıtyn aýmaq.
Qurylys jumystaryn irgeli merdigerlik uıym – «Araıstroımarket-2003» jaýapkershiligi shekteýli seriktestigi aǵymdaǵy jylǵy mamyr aıynda bastaǵan bolatyn. Búgingi tańda jer daıyndaý, usaq tas, qıyrshyq tas, jıek tas jáne iri túıirli asfalt tóseý jumystary tolyqtaı oryndalǵan. «Osy joba aıasynda velosıped kóligi joly boıynda qoqysqa arnalǵan jáshikter, oryndyqtar, velosıpedti ýaqytsha ornalastyratyn arnaıy qurylǵylar, velosıped turaqtary men sáıkestendirý jol belgilerin ornatý kózdelýde. Sonymen qatar jer teliminiń basynda jáne sońynda oblysymyz atynan eki monýment ornatý oılastyrylyp otyr. Monýmentterdiń irgetasy kýrtınsk granıtinen qalanyp, syrty ıran-egıpettik travertınmen qaptalatyn bolady», deıdi Ádilet Ahataev.
Velojoldardyń ásirese jastar úshin salamatty ómir saltyn qalyptastyrýda mańyzy erekshe bolmaq. Sonymen qatar bul – Astana qalasynyń 20 jyldyq mereıtoıyna oraı Jambyl óńirinen de erekshe estelik.
Astana qalasynan bastaý alǵan barlyq jańalyqtyń elimizdiń árbir óńiriniń damý deńgeıine oń áser etip otyrǵany anyq. Tarıhy tym tereńde jatqan qazaq ulysynyń búgingi uly toıy eldik pen memlekettiliktiń toıy. Babalardyń amanatyna adaldyq tanyta otyryp, erlik shejiresin shertetin eldiktiń toıyna kóne Jambyl óńiriniń de qosary mol. Árqashanda asqaq keıipti Astananyń shuǵylaly kelbeti qazaq júreginiń tórinen máńgilik oryn ala beretini daýsyz.
Hamıt ESAMAN,
«Egemen Qazaqstan»
Jambyl oblysy