Astanada Memlekettik hatshy Gúlshara Ábdiqalyqova Memlekettik qyzmetshiler kúnine arnalǵan saltanatty jıynǵa qatysty.
Is-sharaǵa Qazaqstan Respýblıkasy Prezıdenti Ákimshiligi Basshysynyń orynbasary O.Orazalın, Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy A.Shpekbaev, ortalyq jáne jergilikti atqarýshy organdar basshylary, memlekettik qyzmetshiler qatysty.
Gúlshara Ábdiqalyqova óziniń quttyqtaý sózinde Elbasy N.Á.Nazarbaevtyń memlekettik qyzmettiń mıssııasy halyqqa adal qyzmet etý jáne ulttyq múddeni tıimdi qorǵaý degen sózine toqtaldy.
Sodan keıin Memlekettik hatshy bul meıramnyń bıyl táýelsiz Qazaqstannyń sımvoly – Astananyń 20 jyldyq mereıtoıymen oraılas kelgenin atap ótti.
– Árbir memlekettik qyzmetshi el Prezıdentiniń strategııalyq baǵytyn júıeli júzege asyrýǵa óz úlesin qosyp keledi. Halqymyzdyń eren eńbegi men jasampaz isteriniń arqasynda Qazaqstan tabysty ári qýatty jáne bedeldi memleketke aınaldy, – dedi Memlekettik hatshy.
Táýelsizdik jyldary «Qazaqstan – 2050» strategııasyn, Ult josparyn, eldiń Úshinshi jańǵyrýyn tabysty júzege asyryp kele jatqan zamanaýı jáne joǵary kásibı memlekettik apparat qalyptasty.
Búginde memlekettik qyzmet salasynda 98 myńǵa jýyq qyzmetshi eńbek etýde. Keıingi jyldary memlekettik apparattyń turaqtylyǵy qamtamasyz etildi. Kadr almasý 2015 jyldan beri (2015 jylǵy 11,2 paıyzdan 2017 jyly 6,2 paıyzǵa deıin) 2 ese azaıdy. Sońǵy úsh jylda mansap modeliniń arqasynda jumys babynda joǵarylaǵan memlekettik qyzmetshiler sany 4 ese kóbeıdi.
Ekonomıkalyq yntymaqtastyq jáne damý uıymy sarapshylarynyń baǵalaýy boıynsha, Qazaqstannyń memlekettik qyzmet júıesi jahandyq standarttarǵa saı keledi, al memlekettik apparattyń «qartaıýy» jáne genderlik teńsizdik kórsetkishteri jóninen ilgerileýshilik baıqalady.
Merekelik shara aıasynda «Qazaqstan Respýblıkasynyń 2018 jylǵy úzdik memlekettik qyzmetshisi» konkýrsynyń 20 jeńimpazy «Úzdik memlekettik qyzmetshi» tósbelgisimen marapattaldy.
Úzdik qyzmetkerler qatarynan sóz alǵan Atyraý oblystyq ákimdigi ekonomıka jáne bıýdjettik josparlaý basqarmasynyń basshysy Aıdar Nuralıev óziniń júrekjardy tilegin jetkizdi.
– Memleket basshysy bizge 2050 jylǵa deıin álemniń ozyq 30 memleketiniń qataryna kirýge kúsh salýdy mindettedi. Bul mindetke memlekettik basqarý tetiginiń tıimdi jumysy arqyly qol jetkizemiz, – dedi A.Nuralıev.
Marapattaý rásiminen keıin elimizdegi tanymal ártisterdiń jáne óner ujymdarynyń qatysýymen merekelik konsert ótti.
Serik ÁBDIBEK,
«Egemen Qazaqstan»