«Adamzattyń Aıtmatovy» atanǵan alyp tulǵanyń 90 jyldyq mereıtoıy búginde elimizdiń árbir óńirinde atalyp ótýde. Al jazýshynyń ómirinde Jambyl jeriniń orny bólek. Shyńǵys Aıtmatov kezinde Jambyl qalasyndaǵy Lýgovoı mal dárigerlik tehnıkýmynda bilim alǵan. Sonymen qatar zańǵar tulǵa Áýlıeata ólkesin árdaıym qurmet tutatynyn shyǵarmalarynda da jazǵan. Osy oraıda jambyldyqtar da áıgili jazýshynyń mereıtoıyn laıyqty deńgeıde atap ótti.
Jambyl oblystyq Qazaq drama teatrynyń 82-maýsymynyń jabylýyna oraı, teatr sahnasynda Shyńǵys Aıtmatovtyń ómirine negizdelgen Baıǵalı Esenálıevtiń «Tań syry» atty drama-elegııasy sahnalandy. Dramanyń qoıýshy-rejısseri – halyqaralyq Sh.Aıtmatov atyndaǵy syılyqtyń ıegeri Qýandyq Qasymov, al qoıýshy-sýretshisi – Mádenıet salasynyń úzdigi Rahat Saparalıeva.
Shyǵarmada Shyńǵys áleminiń shyndyǵy kórsetilgen. Dramanyń basty keıipkerleri jazýshynyń jary Márııa Ýrmatqyzy men ómirde súıgen ǵashyǵy, belgili bıshi-balerına Búbisara Beıshenalıeva ekeýiniń arasyndaǵy dıalogtarmen óriledi.
Márııa – boıjetken shaǵynda taǵdyr soqpaǵymen Japonııa jerine ketip, týǵan jeri Qyrǵyzstanǵa jete almaı kóp qıyndyqtarǵa tap bolady. Sol ýaqyttarda Shyńǵys Aıtmatov Japonııaǵa shyǵarmashylyq saparmen baryp, ózimen birge Márııany alyp qaıtady. О́zine jar etip, ul-qyz súıedi. Al Búbisara Shyńǵystyń súıgen adamy. Sahnadaǵy qos beıne bir-birine syryn ashyp, muńyn shaǵý arqyly kórermenge jazýshy áleminiń beımálim syrlaryn ashady. Márııanyń «Ekeýmizdiń de taǵdyrymyz bir azamatpen baılanysty bolǵan eken. Demek kúndestermiz. Ras qoı. Biraq meniń eshkim túsinbeıtin syrymdy tek siz ǵana túsinesiz. О́ıtkeni ekeýmiz de bir adamdy qulaı súıdik. Bir adamnyń júregi ekeýmizge ortaq boldy» degen sózderi shynaıy mahabbattyń kórinisin beredi. Búbisaranyń Márııaǵa aıtqan «Biz ekeýmiz ǵana emes, Márııa, ony súıetinder óte kóp. Peshenesine uly ister jazylyp, uly mindetter atqaryp, adamzattyń súıiktisine aınalǵan jandardy bir adamnyń menshikteýi múmkin emes. Ol búkil adamzatqa ortaq. Oǵan ǵashyq, oǵan yntyq áıelderdiń sany ekeýmizben ǵana shektelip qalmaıdy» degen sózderi de Aıtmatovqa degen asqaq mahabbatty ańǵartqandaı.
Dramaǵa jazýshynyń súıgen jarlary men óziniń «Borandy beket», «Jámılá», «Aq keme» shyǵarmalaryndaǵy Jámılá, Danııar, Edige beıneleri arqaý bolǵan. Sonymen qatar Shyńǵystyń ákesi Tórequldyń taǵdyry da eles bergendeı bolady. Qoıylym ereksheligi – bir akterdiń eki rólde birdeı oınaýy boldy. Máselen, akter Málik Aqúrpekov birde Shyńǵys obrazyn somdasa, endi birde Edige beınesine kóshedi. Sondaı-aq Anar Saǵymbekova úsh birdeı Márııa, Buǵy-Ana, Zarıpa beınelerinde jarqyrap kórinse, Jadyra Qultaeva Bıbisara, Jámılá rólderin óz deńgeıinde alyp shyqty. Al Asqar jáne Danııar beınelerin kelistire somdaǵan Rýslan Orazalıev kórermen kózaıymyna aınaldy. Edigeni azaptaǵan Momyn, Shal rólderindegi Júnis Álimbekov jáne Orazqul beınesindegi Asqarbek Seıilhannyń sahnalyq sheberligi kópshilikti tánti etti.
Hamıt ESAMAN,
«Egemen Qazaqstan»
Jambyl oblysy