Shildeniń 8-i kúni alyp shaharda Astananyń 20-jyldyǵyna arnalǵan velosherý ótedi, dep aqparattyq jáne sporttyq HAB habarlaıdy.
«Sporttyq Almaty» baǵdarlamasy aıasynda ótetin velosherýdiń qashyqtyǵy 9 shaqyrymdy quraıdy. Qala qonaqtary men turǵyndary «Nurly Taý» bıznes ortalyǵynda 8:30-da jınalyp, 09:00-de bastaıdy. Áýesqoılar Shyǵys aınalym avto joly, Tóle bı, Dostyq, Shevchenko, Jeltoqsan kóshelerimen júrip, Astana alańynda márege jetedi.
Márede qatysýshylardyń arasynda baǵaly syılyqtar oınatylady. Basty syılyq – velosıped. Velosherý «Challenge. Seniń jańa qyryń!» jobasy aıasynda fınaldyq buqaralyq jattyǵýymen jalǵasady. Uıymdastyrýshylar óz tarapynan, qatysýshylarǵa arnaıy bas kıimsiz (shlemsiz) qatysýǵa tyıym salynatyndyǵyn eskertedi.
Aıta keter jaıt, bul velosherý «Sporttyq Almaty» qalalyq baǵdarlamasynyń qoldaýymen 2018 jyly josparlanǵan 21 velosherýdiń toǵyzynshysy bolyp sanalady.
Daıyndaǵan Aınash ESALI,
«Egemen Qazaqstan»
ALMATY