Shomylý maýsymynyń basynan elordada 8 adam sýǵa batyp ketti. Qaıǵyly oqıǵa azamattardyń sýda ózin-ózi ustaý erejelerin saqtamaýynan bolady. Osyǵan oraı, qalalyq azamattyq qorǵanys organdary kún saıyn aqparattyq-túsindirý jumystaryn júrgizip jatyr, dep habarlaıdy elorda ákimdiginiń resmı saıty.
Shomylý maýsymy bastalmas buryn, Tótenshe jaǵdaılar departamentiniń qutqarýshylar qyzmeti kúsheıtilgen rejımge kóshedi. Mamandar kún saıyn ózen arnalaryn aralap, azamattarǵa sýda ózin-ózi ustaý erejeleri, alǵashqy medısınalyq kómek kórsetý erejeleri bar jadynamalardy taratady. Astana qalasy Tótenshe jaǵdaılar departamentiniń bólim basshysy, podpolkovnık Eldor Raıymbekovtyń aıtýyna qaraǵanda, qaıǵyly oqıǵalar negizinen ata-analardyń nemquraılyǵynan, belgilenbegen jerde sýǵa túsýinen, azamattardyń alkogoldi ishimdik ishýinen bolady.
«Astana qalasynda shomylýǵa ruqsat etilgen jaǵajaılarda abyroı bolǵanda qaıǵyly oqıǵa tirkelgen joq. Azamattar belgilenbegen jerde shomylý kezinde sýǵa batyp ketken. Búginge deıin 17 azamatty sýda ózin-ózi ustaý erejelerin saqtamaǵany úshin ákimshilik jaýapkershilikke tarttyq. Olardyń kóbisi tyıym salynǵan sý qoımasynda shomylyp, alkogoldi ishimdik ishken, balalaryn qaraýsyz qaldyrǵan», – dep málimdedi Eldor Raıymbekov.
Osyndaı oqıǵalardy boldyrmaý, olardyń sanyn azaıtý maqsatynda Astana qalasy TJD mamandary elorda turǵyndary men qonaqtaryn tyıym salynǵan jerlerde shomylmaýǵa shaqyrady.
«Shomylýǵa ruqsat berilmegen jerlerdegi sýdyń túbi qandaı ekeni belgisiz. Bir jyldyń ózinde sý relefi ózgerýi múmkin. Biletin adamnyń ózi júrek aýrýyna shaldyqqan bolsa, bulshyq etterdiń tartylyp qalýynan sýǵa batyp ketedi. Biz ruqsat berilgen jerlerde shomylýǵa keńes beremiz. Sebebi, ondaı sý qoımalary qajettiniń bárimen jabdyqtalyp, qutqarýshy mamandardyń qyzmetimen qamtamasyz etilgen. Barlyq erejelerdi saqtaý kerektigin elordalyqtardyń esine taǵy da bir márte salǵym keledi, eskertilgen talaptardy oryndaǵan jón», – dedi TJD departamentiniń bólim basshysy.
Aıta keteıik, shomylý maýsymy elimizde 1 qyrkúıekte aıaqtalady.