9 shilde kúni Ulybrıtanııada elimizdiń «Rýhanı jańǵyrý» baǵdarlamasyn júzege asyrý jónindegi ulttyq komıssııasy men Kembrıdj ýnıversıtetiniń baspasy arasynda ózara áriptestik týraly memorandýmǵa qol qoıyldy. Bul kelisimge sáıkes qazirgi zamanǵy qazaqstandyq ádebıet antologııasyn aǵylshyn tiline aýdarý, basyp shyǵarý jáne taratý jobasy júzege asyrylatyn bolady.
Qol qoıý barysynda belgili bolǵanyndaı, qazirgi zamanǵy qazaqstandyq ádebıet úlgileriniń jınaǵy «Jahandyq álemdegi zamanaýı qazaqstandyq mádenıet» jobasy aıasynda Birikken Ulttar Uıymynyń 6 tiline aýdarylmaq. Bul joba Qazaqstan Prezıdenti Nursultan Nazarbaevtyń bastamasymen qolǵa alynǵan «Rýhanı jańǵyrý» baǵdarlamasynyń quramdas bóligi sanalady. Jobanyń mindeti – búgingi álemge táýelsizdik jyldaryndaǵy kıno men teatr, horeografııa, óner, beıneleý jáne mýzyka óneri men ádebıet jetistikterin tanystyrý.
Qazaqstan tarapynan memorandýmǵa «Rýhanı jańǵyrý» baǵdarlamasyn júzege asyrý boıynsha ulttyq komıssııanyń hatshysy Aıda Balaeva qol qoıdy. «Brıtandyq keńes tarapynan qoldaý, sondaı-aq CambridgeUniversityPress sııaqty belgili uıymmen áriptestik pen onyń 500 jyldyq tájirıbesi jáne talassyz bedeli bizdiń jobamyzdyń sátti bolýyna jaqsy negiz bolady dep oılaımyn. Bul aýdarmanyń joǵary sapasyna, sondaı-aq Ulybrıtanııada ǵana emes, aǵylshyn tildi álemde keńinen taralýyna múmkindik beredi. Biz dál osy ispetti kelisimdi antologııany ıspan, fransýz, orys, qytaı jáne arab tilderinde de basyp shyǵarý úshin júrgizýdemiz. Áleýetti áriptesterimizge talap joǵary. Basymdyq tájirıbege, bedelge jáne baspanyń múmkindikterine qaraı beriledi», dedi saltanatty sharada Aıda Balaeva.
О́z kezeginde CambridgeUniversityPress bilim jáne reforma boıynsha dırektory Djeın Mann Qazaqstanmen mańyzdy mádenı jobada áriptes bolǵanyna qýanyshty ekenin jetkizdi. «Biz qazaqstandyq proza men poezııa avtorlaryn aǵylshyn tildi álemniń oqyrmandarymen jaqyn tanystyrý úshin barlyq kúsh-jigerimizdi salamyz. CambridgeUniversityPress jobaǵa tikeleı qatysý múmkindigin alǵanyna rızashylyǵyn bildiredi» dedi ol.
Joba týraly aıtar bolsaq, «Rýhanı jańǵyrý» baǵdarlamasynyń bir baǵyty sanalatyn «Jahandyq álemdegi zamanaýı qazaqstandyq mádenıet» jobasyn júzege asyrý aıasynda qazirgi zamanǵy qazaqstandyq ádebıettiń eki antologııasyn basyp shyǵarýǵa daıyndyq jáne aýdarma jumystary júrgizilýde. Ár antologııanyń kólemi shamamen 500 betten turady. Ár antologııaǵa 30 qazaqstandyq avtordyń shyǵarmalary enedi. Antologııanyń qurylymy men mazmuny Qazaqstan Jazýshylar odaǵynyń arnaıy otyrysynda bekitildi.
Aǵylshyn tilindegi antologııany aýdarý jáne basý jobasynyń strategııalyq seriktesi retinde «Brıtandyq keńes» jobaǵa sarapshylyq qoldaý kórsetedi. Kembrıdj ýnıversıtetiniń baspasy sheshýshi áriptes-baspa retinde jolma-jol ádebı óńdeý, baspaǵa daıarlaý, basý, taratý, sondaı-aq aǵylshyn tildi elderge usyný men taratý boıynsha jumys kesheniniń barlyǵyn júrgizedi.
Qazirgi kezde jolma-jol aýdarýǵa, sondaı-aq jolma-jol ádebı óńdeýdi tıisti kórkemdik deńgeıine deıin jetkizetin ádebı aýdarmashylar pýlyn jasaqtaý jumysy júrgizilýde. CambridgeUniversityPress bazasynda daıarlanǵan antologııa aǵylshyn tili resmı mártebege ıe barlyq elde taratylady dep josparlanyp otyr.
«Egemen-aqparat»