Oral qalasynda «Qazaqstannyń úzdik taýary» respýblıkalyq baıqaýynyń óńirlik irikteý kórmesi ótti. Kórmege 32 mekeme qatysqan. Batys Qazaqstan oblystyq kásipkerler palatasynyń dırektory Sáken Karın jyl ótken saıyn bul baıqaýǵa qatysýshylar kóbeıip kele jatqanyn aıtady.
Kórme ótip jatqan qazaq teatrynyń keń foıesi abyr-sabyr, merekelik qarbalasqa tolǵan. Qaz-qatar ornalasqan kabınalarda jup-jumyr jumysy bar jeke kásipker de, bolashaqta alyp zaýytqa aınalmaq ambısııasy bar alpaýyt sehtar da baıqalady. Jyl saıyn ótkizilip kele jatqan «Qazaqstannyń úzdik taýary» baıqaýynyń maqsaty da sol: eń basty talap – tutynýshy suranysyna ıe bolatyn, kóńilinen shyǵatyn sapaly taýar usyný.
- Byltyr osy kórme-jármeńkege qatysýshylardyń sany 30-ǵa jetpegen edi. Bıyl kóbeıdi. Qatysýshylar úsh túrli joldamany sarapqa salady. Iаǵnı «О́ndiristik maqsattaǵy úzdik taýarlar», «Halyq tutynatyn úzdik taýarlar» jáne «Úzdik azyq-túlik taýarlaryn» anyqtaımyz. Jeńimpazdar respýblıkalyq synǵa joldanady. Ol jaqtan úzdik atansa, TMD elderiniń úzdik taýarlary kórmesinde Qazaqstan atynan qatysady. Munyń bári taýar óndirýshi úshin óte tıimdi, tegin jarnama ǵoı, - deıdi osy sharany uıymdastyrýshy, Batys Qazaqstan oblystyq kásipkerler palatasynyń dırektory Sáken Qarın.
Kórmeni aralap kelemiz. Zelenov aýdanynan kelgen qolónershi Arman Aıtpaevty kópten tanımyz. «Aýyldaǵy Armanı» atanǵan sheber jigit múmkindigi shekteýli bolǵanyna qaramastan túrli teri buıymdaryn jasaıdy. Ámııan, áıel sómkeleri, beldikter, tumar t.b. ulttyq naqyshtaǵy dúnıelerimen tanymal Arman jyl ótken saıyn kásibin damytyp, sóresin jańa taýarlarmen tolyqtyryp keledi eken.
«AsArCollection» JShS uıymdastyrǵan kórme aldynda bógelip qaldyq. Sapasy men ádemiligi sheteldik buıymdardan kem emes myna aıaqkıimder ózimizdiń Qazaqstanda, onyń ústine Oral qalasynda jasalyp jatyr degenge keıbireýler senbeýi de múmkin.
- Bizdiń kásiporyn 2017 jyldyń qarasha aıynda ǵana iske qosyldy. Sehymyz tolyq qýatyna qosylǵanda kúnine 2400 dana aıaq kıim shyǵara alamyz, - deıdi kásiporynnyń kommersııalyq dırektory Áset Bekturǵanov.
Áset Ramazanulynyń aıtýynsha, kásiporyn jergilikti turǵyndardan teri alyp, óńdeýge kirisken, ázirge qoı terisin ıleý, óńdeý, boıaý kezeńderi jolǵa qoıylǵan.
- Ázirge jergilikti shıkizatty joǵary sapaly aıaq kıimder tigýge laıyqtap óńdeýge qol jete qoıǵan joq. Tekstıldi teri óndirý – óte qıyn prosess. Biraq biz buıyrsa oǵan da jetemiz. О́ıtkeni batysqazaqstandyq qoı terisiniń tabıǵı sapasy óte joǵary – qysy sýyq, jazy ystyq aýa raıynyń ózi bul jerdegi qoı terisine erekshe qasıet bergen, - deıdi óndiris qupııasymen bólisken Áset Bekturǵanov.
Batys Qazaqstan oblysy ákiminiń orynbasary Mırjan Satqanov kórmege qatysýshy barlyq kásipkerdiń taýarlaryn asyqpaı kórip, qoldaý bildirip, memleket tarapynan, jergilikti bılik tarapynan kásipkerlikti damytýǵa barynsha kómek beriletinin aıtty.
Ulttyq naqyshtaǵy sándik kıimderimen respýblıkaǵa belgili «Marııa hanym» sán úıi osy kórmede isker áıelderge arnalǵan zamanaýı kıim úlgilerin usynǵan eken. О́tken jyly Birikken arab ámirlikterinde, Fransııada ótken kórmelerde oraldyq sán brendteri erekshe qyzyǵýshylyq týdyrypty.
- Avtokóliktiń paıdalanýǵa jaramsyz bolyp qalǵan rezińke dóńgelekterinen mynadaı túrli-tústi plıtalar jasaý – bir oqpen eki qoıandy atqandaı ǵoı, - deıdi qyzyl-jasyl tústi ádemi rezińke tósemder shyǵaratyn «Shıny Live» fırmasynyń jetekshisi Sergeı Gýber. 2012 jyly tirkelgen jeke kásipker sońǵy úsh jyldan beri «Qazaqstannyń úzdik taýary» kórmesine turaqty qatysyp keledi eken.
Erinbeı eńbek etken adamǵa kásiptiń kózi kóp qoı. «Dýtkına» jeke kásipkerligin qurǵan Vladımır men Iýrıı teńiz ónimderin óńdep, satylymǵa shyǵarǵan. «Qıyr Shyǵystan muzdatylǵan balyq aldyryp, Oraldaǵy shaǵyn sehta tuzdap, óńdep jatyrmyz. Kásiporynda 8 adam qyzmet etedi. О́nimimizdi jergilikti saýda úılerine, sýpermarketterge tapsyramyz, halyqtyń suranysy jaqsy» deıdi kásipkerler.
Sonymen, Oralda ótken «Qazaqstannyń úzdik taýary» óńirlik kórme-baıqaýyna qatysýshy kásipkerler usynǵan taýarlardy túgel saraptap shyqqan arnaıy komıssııa músheleri eń úzdik toǵyz kásiporynǵa respýblıkalyq baıqaýǵa joldama usyndy.
Joǵaryda aıtylǵandaı, joldama «О́ndiristik maqsattaǵy úzdik taýarlar», «Halyq tutynatyn úzdik taýarlar» jáne «Úzdik azyq-túlik taýarlar» atalymdary boıynsha sarapqa tústi.
Arnaıy komıssııanyń sheshimi boıynsha «Oral saýda-ónerkásip kompanııasy» JShS, «BatysMunaıJabdyqtary» JShS jáne «Batys Qazaqstan mashına jasaý kompanııasy» JShS usynǵan kúrdeli tehnıkalyq jabdyqtar Batys Qazaqstan oblysynyń «óndiristik maqsattaǵy úzdik taýary» bolyp tanyldy.
«Halyq tutynatyn úzdik taýarlar» atalymyna mektep kıim úlgisin usynǵan «Nadejda» JShS, «Kondensat» JShS jáne «Marııa hanym» sán úıi ıe boldy.
Al «Úzdik azyq-túlik taýarlary» atalymy boıynsha kondıterlik tátti torttarymen áıgili «Balzııa» JShS, sút ónimderin óńdeýshi «Kaverına» JK jáne taza sý shyǵaratyn «Fırma «Rodnık» JShS úzdik dep tanyldy.
Kórmeni qorytyndylaǵan Qazaqstan Respýblıkasy «Atameken» Ulttyq kásipkerler palatasynyń ókili Madına Muqatova men Batys Qazaqstan oblystyq kásipkerler palatasynyń dırektory Sáken Karın kórmege qatysqan barlyq kásiporyn ıelerine alǵys hat tabystady.
Aıta ketý kerek, respýblıkalyq baıqaýǵa elimizdiń barlyq 17 aımaǵynan úmitkerler qatysyp, solardyń ishinen tek 9 ǵana jeńimpaz atanady.
Qazbek QUTTYMURATULY
«Egemen Qazaqstan»
Oral qalasy