Bıyl Qaraǵandy óńiriniń Bektaýata shatqalyndaǵy balalarǵa arnalǵan «Fakel» maýsymdyq saýyqtyrý lageri taǵy bir tamasha bastamany qolǵa aldy. Tabıǵat aıasyna shyqqan jas jetkinshekter budan bylaı demalyp qana qoımaı, zııatkerlikti damytý alańdarynda ózderiniń qabiletterin arttyrýǵa múmkindikteri bar. Atap aıtqanda, robot-tehnıka, qolmen modeldeý, qoldanbaly óner zerthanalarynda jumys isteý, lager landshaftaryn kógaldandyrý, kógershin asyraý, bı úıirmesi, qýyrshaq teatry jáne úshtildilik sııaqty jazǵy mektepterdiń jumysy búginde lager aıasyn keńeıte túsken. Bul birinshiden, balalardyń tanymy men talantyn ushtaý bolsa, ekinshi jaǵynan týrızmniń tetikterin jetildirýdiń taǵy bir arnasy deýimizge bolady.
Atalǵan alańda sonymen qatar eresek balalar otrıadymen trenıng formatynda kásiptik baǵdarlaý boıynsha jumystar da júrgiziletinin aıta ketkenimiz jón. Búginde bolashaq mamandyǵyńdy durys tańdaýdyń mańyzdylyǵy zor. Bul – ár jetkinshektiń aldynda turǵan ózekti másele. Údemeli damý ústindegi álemde fýtýrologtar qaısybir mamandyq túrleriniń múldem suranyssyz qalyp, jańa bir mamandyq túrleriniń paıda bolatyny týraly aıtady. Sondyqtan da mamandyq tańdaýda birqatar faktordy alǵa tarta otyryp, durys qadam jasaý asa mańyzdy. «Fakel» maýsymdyq saýyqtyrý lageri sol psıhologııa men kásiptik baǵdar arasyndaǵy kózge kórinbes baılanystyń búgini men erteńine erkin kóz júgirtýdi kózdeıdi.
Jýyrda aqtoǵaılyq balalardyń jazǵy demalysymen jáne turmystyq jaǵdaıymen tanysqan Qaraǵandy oblystyq bilim basqarmasynyń basshysy Esenǵazy Imanǵalıev sport alańdarynda, kóshedegi jattyǵý qurylǵylarynda, skalodromda, standartty emes sporttyq jabdyqtarda jattyǵyp júrgen jastardyń arasynda bolyp, balalarǵa adam mıynyń is-áreketti qalaı basqaratynyn baıandap berdi. Balalar da ózderi qurastyrǵan 5 jaıaý týrıstik marshrýt pen 1 velosıpedtik týrıstik marshrýt týraly oılary men áserlerin ortaǵa salyp, ózderin saıahatqa shyǵyp qana qoımaı, Qazaqstannyń kıeli oryndarynyń biri Bektaýatamen tereńirek tanysqandaryn jetkizdi.
Esenǵazy Nurtóleýuly jetkinshekterge sosıonıka, ıaǵnı adam psıhıkasynyń qorshaǵan ortamen aqparattyq qarym-qatynas jasaý ǵylymy týraly qyzyqty da tartymdy áńgimelep berdi. Onyń aıtýynsha, «Dıhatomıkalyq test» júrgizý barysynda trenıngtiń ár qatysýshysy óziniń tulǵalyq tıpin aıqyndaı aldy. Sonymen qatar ár jasóspirimge qabiletterin qandaı salada qoldanýǵa qatysty jáne mamandyq tańdaý boıynsha usynystar berýge bolady.
Trenıng barysynda balalar belsendilik tanytyp, áralýan suraqtar qoıdy. Sosıonıkalyq bilimge úlken mán berip, ony jetistikke jetý úshin durys paıdalaný týraly kóptegen jańa aqparat aldy. Áńgime áserine bólengen balalar qyrkúıek aıynda mektepke kelgen kezde qurdastarymen de osyndaı kezdesý ótkizetindikterin aıtty. Bul úshin lagerdiń psıhologtary men áleýmettik pedagogteriniń qyzmet kórsetý ortalyǵy qosymsha oqytý sabaqtaryn jandandyra túspek.
Mıras ASAN,
«Egemen Qazaqstan»
Qaraǵandy oblysy