22 shilde men 5 tamyz aralyǵynda Astanada tuńǵysh ret halyqaralyq «CENTRAL ASIAN DANCE FESTIVAL» sheberlik synyptary festıvali ótedi. Shara uıymdastyrýshylary – Amerıka Qurama Shtattarynyń Astanadaǵy elshiligi men Qazaq Ulttyq horeografııa akademııasy, dep habarlaıdy elorda ákimdiginiń resmı saıty.
Astana qalasynda alǵash ret ótetin «CENTRAL ASIAN DANCE FESTIVAL» sheberlik synyptary festıvali Túrikmenstan, Tájikstan, Qyrǵyzstan, О́zbekstan jáne Qazaqstan sııaqty Ortalyq Azııa elderiniń talantty bıshileri men horeograftarynyń basyn biriktirmek.
Birneshe aı buryn uıymdastyrylǵan beıne-kastıngten ótken bıshiler halyqaralyq deńgeıdegi sharanyń qatysýshylary atandy. Osylaısha, Amerıka Qurama Shtattarynyń Astanadaǵy elshiligi bólgen granttyń arqasynda 100 bı sheberi esh aqysyz saıysqa túsedi. Olardyń 50-i Qazaqstan óńirleriniń, 30-y Astananyń jáne 20-sy Ortalyq Azııa elderiniń namysyn qorǵaıtyn bolady.
Festıval aıasynda, Pılkıngton Ketrın, Breanna Ýıllıams syndy AQSh-tyń áıgili horeograftarynyń qatysýymen ótetin eki aptalyq sheberlik synyptarynyń uıymdastyrylýy josparlanǵan. Kásipqoılar qatysýshylar úshin neoklassılyq baletten, kontemporarıden, modrennen, ımprovızasııadan, brodveıden, djazdan, hıp-hoptan, sonymen qatar, bıdi sýretke, beınekameraǵa túsirýden, art-menedjmentten skıll-aptar júrgizbek.
Budan bólek, festıval qatysýshylary negizgi amerıkandyq bı formalarynózderiniń oqytý baǵdarlamalaryna engizý, marketıng pen kommýnıkasııa salasyna qatysty bilimin arttyrý, búgingi tańda kez kelgen bıznestiń tabysty júzege asýynyń mańyzdy marketıngtik bóligin qalyptastyrýshy kıno, fotosýretter men zamanaýı sandyq ónerge arnalǵan quraldarmen tanysý múmkindigin alady.
Uıymdastyrýshylardyń atap ótýinshe, eki aptaǵa sozylatyn shara mádenıaralyq ári kásibı tájirıbe almasý isine negiz bolyp, Ortalyq Azııa aýmaǵyndaǵy neoklassıkalyq jáne zamanaýı horeografııanyń damýyna úlesin qospaq.
Aıta keteıik, alǵashqy «CENTRAL ASIAN DANCE FESTIVAL» sheberlik synyptary festıvali saltanatty túrde 22 shildede Qazaq Ulttyq horeografııa akademııasynda ashylady. Merekelik rásimge QR Mádenıet jáne sport mınıstri Arystanek Muhamedıuly qatysady dep kútilýde.