Ortalyq kommýnıkasııalar qyzmetinde Qazaqstan Respýblıkasynyń joǵary oqý oryndaryndaǵy bilim berý baǵdarlamasy reıtınginiń birinshi kezeń nátıjelerine arnalǵan baspasóz-májilisi ótti. Spıker retinde QR Bilim jáne ǵylym vıse-mınıstri Talǵat Eshenqulov, «Atameken» UKP basqarýshy dırektory Oljas Ordabaev jáne qurylys salasy boıynsha ekspert Álibek Mardanov qatysty.
Bilim jáne ǵylym mınıstrligi men «Atameken» Ulttyq kásipkerler palatasy joǵary oqý oryndarynyń bilim berý baǵdarlamalaryn (bakalavrıat) baǵalaý jumysyn birlese atqaryp otyr. Búginde 33 mamandyqtyń reıtıngi daıyndaldy. Zertteý jumysqa ornalasqan túlekter paıyzy men olardyń ortasha eńbekaqysy, baǵdarlamanyń ózektiligin baǵalaý, sondaı-aq túlekterdiń saýalnama qorytyndysy mańyzdy ólshem bolatyn ádistemege sáıkes júrgizildi. Túlekter men olardyń jumysqa ornalasýy týraly málimetter Joǵary bilimdi basqarýdyń biryńǵaı júıesinen alyndy jáne Bilim jáne ǵylym mınıstrligi bergen málimetpen salystyrylyp tekserildi.
Birinshi kezeńde Bilim jáne ǵylym mınıstrliginen alynǵan ıesi kórsetilmegen málimettermen rastalǵan byltyrǵy túlekterdiń jumysqa ornalasý paıyzy men ortasha eńbekaqyǵa saraptama, professor-oqytýshylyq quramnyń is júzindegi tájirıbesine, joǵary oqý oryndarynyń bilim berý baǵdarlamalaryna salatyn ınvestısııalaryna, bilim berý baǵdarlamalaryn daıyndaý deregine, elektıvti pánder katalogyna, salalyq qaýymdastyqtar men jumys berýshiler birge jasaǵan sıllabýstarǵa, bilim berý baǵdarlamalarynyń halyqaralyq akkredıtasııadan ótýi týraly málimetterine saraptama júrgizildi.
Ekinshi kezeńde salalyq sarapshylardy qatystyra otyryp, bilim berý baǵdarlamalarynyń mazmundyq alshaqtyǵy baǵalanyp, taldandy. Sonymen qatar sarapshylar berilgen baǵdarlamalar QR Bilim jáne ǵylym mınıstrligi bekitken formaǵa sáıkes emestigin (4-aq betke jazylǵan bilim berý baǵdarlamalary kóp, onyń qaǵaz júzinde ǵana ekenin rastaıdy), sondaı-aq orfografııalyq jáne stılıstıkalyq qatelikteri bar ekenin atap ótti.
Aıta keteıik, osy jyldyń sońyna deıin Ulttyq kásipkerler palatasy 50-den astam mamandyqtyń reıtıngin usynatyn bolady.