Sarapshylardyń sózine sensek, búgingi tańda álemde árbir 45-shi bala aýtıst bolyp týylady. О́kinishke qaraı, bul kórsetkish kemýdiń ornyna artyp otyr. Al qazir Qazaqstanda 60 myń adam aýtızm dertimen alysyp keledi.
Alaıda aýtızmmen kúresý aıtarlyqtaı nátıje bermeıdi dep eseptelse de, ony jeńýge bolatynyna «Aýtızmdi jeńemiz» jobasyna qatysýshylardyń kózi jete bastady. Mundaı naýqaspen týylǵan balalar da, olardyń ata-analary da kún saıyn, sát saıyn munyń múmkin ekendigin dáleldeýge kóshti. Eń bastysy dúnıe esigin ashqan kishkentaı adam qandaı synaqpen týsa da, ishten shyqqan sábıińdi súıip, onyń óz qataryna qosylýy úshin qajyrly túrde kúreskende oń nátıje beretini belgili bola bastady.
«Aýtızmdi jeńemiz» jobasy jumys isteı bastaǵanyna bıyl bes jyl bolady, osy aralyqta oǵan qosylǵandar sany úsh ese ósken.
– Az jyl buryn ǵana Qazaqstannyń mamandary aýtızm máselesin qabyldaýǵa qulyqty emes edi. Endigi jerde bul iske memleket te qatysa bastaǵanyn baıqaımyz. Biraq bul máselemen kúresýde ata-analardyń róli erekshe. Olar eshteńege de qaramastan, balasyn emdetýdiń joldaryn izdeıdi. Osynyń jáne áriptesterimizdiń arqasynda aýtızmmen týylǵan balalar ózderiniń armandaryna barynsha jaqyndap, qoǵamǵa beıimdelip keledi, – deıdi «Meıirimdilik erikti qoǵamy» qoǵamdyq qorynyń jetekshisi Arýjan Saın.
Al endi aýtızmnen emdelý jolynda basty kedergilerdiń biri – burynǵydaı arnaýly mamandardyń, ońaltý ortalyqtarynyń jetispeýshiligi bolyp otyr. Dári-dármekterdiń qymbatshylyǵy men sporttyq qural-jabdyqtardyń joqtyǵy da qol baılaıdy.
Osyndaı máselelerdi sheshý úshin «Ashyq júrek» qaıyrymdylyq bastamasy qolǵa alynyp, oǵan «Nomad Inshýrans» saqtandyrý kompanııasy kómekke kelýge daıyn ekendigin bildirgen edi. Nátıjesinde osy aralyqta «Meıirimdilik erikti qoǵamy» qoǵamdyq qory atalǵan joba aıasynda aıtarlyqtaı qarajat jınap, dári-dármekter, sporttyq jattyǵýlarǵa arnalǵan quraldar men jalpy naýqas balalardyń ómirin jaqsartýǵa baǵyttalǵan kerek-jaraqtardy satyp aldy.
Aınash ESALI,
«Egemen Qazaqstan»
ALMATY