Shymkentte 21 jastaǵy Nuraı Serikbaıdyń ólimine qatysty qylmystyq is boıynsha tergeý aıaqtaldy. Bul týraly jábirlenýshi taraptyń advokaty Aıanhan Omarov málimdedi, dep habarlaıdy Egemen.kz.
Onyń aıtýynsha, qazirgi ýaqytta jábirlenýshiler men olardyń qorǵaýshylary qylmystyq istiń materıaldarymen tanysyp jatyr. Búginde istiń alǵashqy jeti tomy zerdelenip, olardyń kóshirmeleri alynǵan.
– Tergeý áreketteri tolyq aıaqtaldy. Qazir qylmystyq is qujattarymen tanysý prosesi júrip jatyr. Jábirlenýshi tarap alǵashqy jeti tommen tanysyp, kóshirmelerin aldy, – dedi advokat.
Taraptardyń barlyǵy is materıaldaryn qarap shyqqannan keıin qylmystyq is sotqa joldanady.
Eske salsaq, qaıǵyly oqıǵa 2026 jylǵy 11 qańtar kúni keshke Shymkent qalasynda bolǵan. Tergeý málimetinshe, 21 jastaǵy Nuraı Serikbaıdy tanysy pyshaqtap óltirip, oqıǵa ornynan boı tasalaǵan. Kúdikti eki kúnnen keıin ustaldy.
Qazirgi ýaqytta ol Shymkent qalasyndaǵy Qylmystyq-atqarý júıesi komıtetiniń №69 mekemesinde qamaýda otyr.
Kúdiktige Qylmystyq kodekstiń birneshe baby boıynsha aıyp taǵylǵan. Atap aıtqanda, oǵan nekege turýǵa májbúrleý, stalkıng jáne asa qatygezdikpen adam óltirý baptary boıynsha aıyptar taǵylyp otyr.