Ulttyq ulan delegasııasy Túrkııada boldy

Alǵashqy kúni qazaqstandyq áskerı delegasııa Ystanbul qalasy jandarmerııasynyń qolbasshysy, general-leıtenant Nýh Koroglýmen kezdesip, kóp mıllıondy mega­po­lıstegi jandarmerııanyń atqaratyn qyzmetimen tanysty.    Kelesi kúni  qazaqstandyq delegasııa Ankaraǵa jol tartyp, Túr­kııa Respýblıkasynyń Qorǵanys mınıstri, armııa generaly Hýlýsı Akar, Túrkııa Respýblıkasy Qarýly Kúshteriniń Bas shtabynyń bastyǵy, armııa generaly Iаshar Gıýler jáne Túrkııa Jandarmerııasynyń Bas qolbasshysy, armııa generaly Arıf Chetınmen kezdesý ótkizdi. Sapar barysynda joǵary laýazymdy ás­kerıler ekijaqty qarym-qatynas týraly sóz etti. Túrik taraby  Ulttyq ulan úshin áskerı kıim úl­gi­leri men qarý-jaraq, arnaıy qural­dar, oq-dárilerdi jetkizýge ynta ta­ny­typ otyr. Osydan keıin qazaq­stan­dyq delegasııa nazaryna qor­ǵanys-ónerkásiptik kesheniniń «Nýr­oltehnolodjı», «AVS», «Gazı Fı­shek» ónerkásipteri usynyldy. Ári qaraı qazaqstandyqtar jan­­dar­merııanyń jedel shtab orta­lyǵynda bolyp, memlekettik sheka­rany barlaý jáne pılotsyz ushý ap­pa­rat­taryn qoldaný arqyly kúzetý múm­kindikteri, sondaı-aq bire­geı aq­parattyq keńistikke birik­ti­rilgen tulǵalar men kólik qural­daryn tanıtyn mobıldi júıemen tanysty. Sonymen qatar sapar aıasynda túrik áskerıleri Krımınaldyq orta­lyqta arnaıy operasııalardy qam­tamasyz etý qurylǵylarynyń kórmesin uıymdastyrdy. Delegasııa múshe­leri ınjenerlik qyzmet múl­kine qy­zy­ǵýshylyq tanytyp, arnaıy ınje­nerlik tehnıka men mına-izdeý qu­raldary bar robottar nazarǵa ilikti.  Kelissózder barysynda ma­man­­dar­dyń kásibıligin joǵary­latý jáne  áskerı bilim berý bo­ıynsha má­se­lelerdiń sheshi­lýi qaraldy. Osylaısha, Jan­dar­merııa ýchılıshe­sinde oqyty­latyn Qazaqstan kýr­sant­tarynyń sanyn jylyna  8 adamǵa deıin kóbeıtý týraly sheshim qabyldandy. Sondaı-aq Túrkııa Respýblıkasynyń akademııa­larynda Túrkııa áskerı oqý oryndaryn aıaqtaǵan Qazaqstan Ulttyq ulanynan jiberilgen túlekterdiń oqýlaryn ári qaraı jalǵastyrý týraly kelisimge qol jetkizildi. Budan bólek Túrkııa oqý oryndary bazasynda arnaıy maqsattaǵy mamandarmen (mergen, jarǵysh tehnık, sýǵa súńgýshi jáne taǵy basqa)  ótkiziletin kýrstardyń sany artty. Túrkııa Ishki ister mınıstri jáne Jandarmerııa Bas qol­bas­shysymen kezdesý barysynda  Qazaqstan Ulttyq ulanyn Eýropa jáne Ortalyq teńiz elderiniń Jandarmerııa jáne polısııa kúshteriniń qaýymdastyǵy (FIEP) quramyna kirgizý máselesi sóz etildi. Atalǵan  uıymǵa birqatar Eýropa memleketteri múshe. Bul óz kezeginde ulandyqtarǵa assosıasııa músheleriniń arnaıy bólimsheleri áreketiniń taktıkasyn úırenýge, olardyń oqý-materıaldyq bazasynda jıyn daıyndyqtaryn ótkizýge, sondaı-aq bólimshelerdiń materıaldy-tehnıkalyq qamtylýyn kóterýge múmkindik beredi.  Tájirıbe almasý aıasynda túrik taraby jyl saıynǵy «Áskerı kerneı» halyqaralyq áskerı-mýzykalyq festıvalǵa qatysýǵa, sondaı-aq Almaty ob­lysy 5574 áskerı bólimi arnaıy maqsattaǵy bólimshelerdi jaýyn­gerlik jáne ádistemelik daıyndaý ortalyǵy bazasynda ótetin arnaıy maqsat bólimsheleriniń oqý-jattyǵýlaryna qatysýǵa ynta tanytty.  Sapar barysynda qazaq­stan­dyq delegasııa «Atatúrik» kese­ne­si­ne baryp, gúl shoqtaryn qoı­dy.

«Egemen-aqparat»