Qadyr Myrza Áli atyndaǵy mádenıet jáne óner ortalyǵynda qos basylym qyzmetkerlerine qurmet kórsetilip, oblystyq mýzeıde arnaıy kórme ashyldy.
Bastaýyn 1917 jylǵy aqpan tóńkerisinen keıin Bókeı ordasyndaǵy qazaq zııalylary shyǵarǵan «Uran» gazetinen alatyn «Oral óńiri» jáne «Prıýrale» gazetteri ǵasyrlyq toıyn byltyr atap ótken edi. Ekinshi ǵasyrǵa aıaq basqan basylymdardyń týǵan kúnin «Jaıyq Press» medıaholdıngi erekshe atap ótti. Ár jyldary gazette qyzmet etken, redaktorlyq jasaǵan qaıratkerlerdiń obrazyn Hadısha Bókeeva atyndaǵy qazaq drama teatrynyń artısteri somdap, ult zııalylarynyń ólmeıtin sózi men oı-pikirlerin kórermen nazaryna taǵy bir usyndy.
Arnaıy beınerolıkte basylymdardyń ǵasyrlyq tarıhy, Ǵumar Qarash, Ǵabdolǵazız Musaǵalıev, Nuǵyman Manaev, Mustafa Kókebaev, Halel Esenbaev, Tamımdar Safıev, Ahmet Mamytuly syndy tulǵalardyń ómir joly men ulttyq baspasózdi qalyptastyrýdaǵy eńbegi týraly aıtyldy. Batys Qazaqstan oblysy ákiminiń orynbasary Ǵabıdolla Ospanqulov ǵasyrdan asqan jasy bar ujymdy quttyqtap, bir top jýrnalıstke Aqparat jáne kommýnıkasııalar mınıstrliginiń arnaıy marapatyn tabystady. Bul kúni «Prıýrale» gazetiniń bólim redaktory Lýchııa Kýrararý, radıo jýrnalısi Áýes Orynaeva Aqparat salasynyń úzdigi tósbelgisimen marapattalsa, mınıstrliktiń Qurmet gramotasyna «Oral óńiri» gazetiniń bólim redaktory Nurbek Orazaev ıe boldy.
- Buǵan deıin qos gazettiń 47 myńdaı nómiri jaryq kóripti. Ár nómirinde aǵa býynnyń qanshama qajyr-qaıraty, azap-mehnaty men tabandylyǵy, jankeshtiligi, talaıly taǵdyry jatyr. Sondyqtan mundaı merekeni jyl saıyn atap ótsek te eshqandaı artyqtyǵy joq. Sol sańlaqtar salǵan sara joldy áriptesterimiz abyroımen jalǵastyryp keledi. Endeshe tól mereke qutty bolsyn! Qalam qýatynyń qasıetin amanat dep bilip, árdaıym halyqqa adal qyzmet ete berýlerińizdi tilek qylamyn! - dedi «Jaıyq Press» medıaholdınginiń bas dırektory Raýan Sábıtov.
Bul qyzmetke jaqynda ǵana taǵaıyndalǵan Raýan Sábıtulynyń alǵash uıymdastyrǵan kópshilik sharasy – tarıhqa taǵzym, aldyńǵy tolqyn aǵalarǵa qurmet kórsetýden bastalǵanyn óńirdegi jýrnalıstıka ardagerleri qýanyshpen qarsy aldy. «Oral óńiri» gazetin uzaq jyl basqarǵan Májıt Qaıyrǵalıevke bul kúni erekshe qurmet kórsetilip, ıyǵyna shapan jabyldy.
Batys Qazaqstan oblystyq tarıhı-ólketaný mýzeıinde «Ǵasyr jasaǵan qos basylym» degen taqyryppen arnaıy kórme ashyldy. Kórmede gazet redaksııalarynda uzaq jyl qyzmet etken ardager jýrnalısterdiń tutynǵan buıymdary, kásibı quraldary qoıylǵan. Sondaı-aq sovettik saıası repressııaǵa ushyrap, «halyq jaýy» atanǵan gazet qyzmetkerleri týraly qujattar, kóne gazetter de kelýshilerge kóptegen tyń málimetter beredi. Munda aqyn Janǵalı Nábıýllınniń mashınkasy, maıdan gazetinde qyzmet etken qart tilshi Bısen Jumaǵalıevtiń portfeli, Sábıt Muqanovpen jazysqan hattary, baspahanalyq qorǵasyn buıymdar, t.b. kóptegen jádigerler bir aı boıy oblystyq mýzeı ekspozısııasynda kórermen nazaryna usynylmaq.
Qazbek QUTTYMURATULY,
«Egemen Qazaqstan»
Batys Qazaqstan oblysy
Sýretti túsirgen Aıbatyr NURASh