Qyzyljar óńirinde shyny shıkizatynan túrli buıymdar jasap, ony paıdaly kásipke aınaldyryp otyrǵandardyń biri – Anna German. Ol alǵashqylardyń biri retinde osy salanyń damýyna óz úlesin qosyp, búginde tapsyrys boıynsha da jumys isteıdi. Aıtýyna qaraǵanda kishkentaı kezinen balshyqtan, qyshtan ártúrli zattar jasaýǵa beıim bolypty. Eseıe kele sheberligin jetildirý maqsatymen Reseıdiń Ekaterınbýrg qalasyndaǵy shyny óndirisi akademııasyna oqýǵa túsip, kópshilikke beımálim qolónerdiń qyr-syryn tereń ıgerýge den qoıady.
– Ol kezde Petropavl óner kolledjin bitirip, sándik-qoldanbaly óner jáne keramıka pánderinen sabaq berip júrgen edim. Dıplom alyp, kásibı maman atanǵannan keıin Almatydaǵy T.Júrgenov atyndaǵy óner akademııasynan, ózge de oqý oryndarynan shaqyrtý aldym. Biraq kenjeleý qalǵan salany jergilikti jerde órkendeteıin degen sheshimge keldim, – deıdi Anna Mıhaılovna ótkendi eske túsirip.
О́ner álemine fıýzıngtiń dendep engenine attaı alpys jyl ótse de, qazaqstandyqtarǵa áli de tańsyq kórinedi. О́ıtkeni, elimizde arnaıy oqý orny bolmaǵandyqtan, talapkerler syrtqa ketýge májbúr. Jańashyldyqqa jany qumar Annanyń bir oıy – jastardy fıýzıngke úırete otyryp, sheberlik mektebin qalyptastyrý. Qazirdiń ózinde oǵan tolyq negiz bar. Sheberdiń basty quraly – arnaıy pesh. Ony Ekaterınbýrgten aldyrtqan. Zaýyt basshylyǵy Annanyń tyń isterge jeteleıtin talabyn qoldap, ekinshi peshti qoljetimdi baǵaǵa bergen. Bul sala kóp shyǵyndy qajet etedi. Máselen, eń arzan degen peshtiń quny Reseıde 50 myń rýbl tóńireginde. Oǵan shyny kesetin temir jáne almas pyshaqtar men qaıshylardy, shyny syndyratyn quraldardy qossaq, jumsalatyn qarajattyń eselene túseri anyq. Shıkizat Amerıkadan, Italııadan arnaıy tapsyrys boıynsha alynady. Annanyń «qolóner ıelerine memleket tarapynan qoldaý kórsetilýin qalar edim. Reseıde jeńildikti sharalar qarastyrylady. Nıet etkender bıznes-jospar túzip, tıimdiligin dáleldeı alsa, qarjy bólinedi» degen sózine alyp-qosarymyz joq.
Bastapqyda saǵat, bilezik, janýarlardyń beınesin, gúlder, áshekeı zattar, syrǵa, kádesyılar jasap, tájirıbe tolysqannan keıin kúrdeli dızaındarǵa kóshken. Aldymen buıymnyń nobaıyn syzyp, sol boıynsha kesilgen shynydan applıkasııa jasaımyz, sosyn peshke salyp, balqytamyz. Peshten kózdiń jaýyn alatyn da- ıyn ónim shyqqanymen, qyrlaý, árleý jumystary uzaq ýaqyt alady. Kózdiń maıyn taýysatyndaı beınetti eńbekti qajet etedi», deıdi ol.
Qazir Annanyń jeke sheberhanasy, «Lepota» dep atalatyn stýdııasy bar. Onda sýret salýdyń, balshyqtan buıymdar jasaýdyń, bir sózben aıtqanda, fıýzıngtiń tylsym qurpııalary úıretiledi. О́zimen birge Janar Salhanova, Vasılına Beloýsova syndy oqytýshylar sabaq beredi. Stýdııada 30 bala men on shaqty eresek adam tálim alyp júr. Keıbireýleri birneshe jyldan beri oqıdy. Mysaly, stýdııa tabaldyryǵyn 7 jasynda attaǵan Anjelıka Rahımova – kolledj stýdenti. Balalarǵa sabaq berýge jarap qalǵan. Munda shákirtter sýret salady, applıkasııalar jasaıdy, san alýan tehnıkaǵa kóńil bólip, pape-mashe, batık, aralas tehnıkanyń bárin úırenedi. Oǵan bor da, boıaý da, gýash ta qoldanylady.
Anna Germannyń basty ustanymy – sheberligin toqtaýsyz damyta berý.
Roza ShÁKENOVA,
jýrnalıst
Soltústik Qazaqstan oblysy