Aqtóbe oblysynda bıýdjet qarjysyn ıgerýde birqatar kemshilikke jol berilgen

Serik ÁBDIBEK,

«Egemen Qazaqstan»

Otyrysty ashqan komıtet tóraǵasy Natalıa Godýnova Aq­tóbe oblysynda ónerkásip ón­di­risi men aýyl sharýashylyǵy jal­py óniminiń kólemin kóbeıtý, ju­mys­syzdyqty azaıtý, halyq­ty qoljetimdi baspanamen qamta­ma­syz etý baǵytynda eleýli ju­mys­tar atqarylǵandyǵyn atap ótti. 

– Aqtóbe oblysy ekono­mı­kanyń damýy boıynsha joǵary ná­tıjelerge qol jetkizip otyr. О́tken jyly ǵana óńir ekonomıkasy 5,6 prosentke ósti. Bul – eli­mizdegi ekinshi kórsetkish. Ob­lysqa ınvestısııa tartý da bel­sendi júrgizilýde, ótken jyldyń qo­rytyndysy boıynsha óńirge 440 mlrd teńge salynsa, onyń 25 prosenti – sheteldik ınves­tısııa. Memleket basshysynyń ekonomıkany ártaraptandyrýǵa baılanysty tapsyrmasy da tabysty júzege asyrylýda. Men kásibı maman retinde Aqtóbe oblysy elimizde ekonomıkany ártaraptandyrý kórsetkishi boıynsha kóshbasshy dep esepteımin, – dedi N.Godýnova óz sózinde. 

Esep komıteti tóraǵasynyń aıtýynsha, Memleket basshysynyń Joldaýyndaǵy tapsyrmalardy júzege asyrý maqsatynda ob­lys­taǵy 20 kásiporyn zaman talabyna saı jańǵyrtylǵan. Olarǵa 20 mlrd teńge kóleminde ınvestısııa salynǵan. Bıylǵy jyly 55 mlrd teńge jumsalyp taǵy 35 óndiris ornyn jańǵyrtý kózdelgen. 

О́ńir turǵyn úı qurylysy sa­la­synda da kóshten ozyp tur. «Nur­ly jer» baǵdarlamasyn júze­ge asyrýda alǵashqy bolyp iske ki­risken óńirdiń nátıjeleri de jo­ǵary ekendigi atalyp ótildi. 

Al osy respýblıkalyq bıýd­jet­ten bólinetin qyrýar qarjy­ny maqsatymen, tıimdi túrde jum­saýda birqatar kemshilik jol berilgen. Onyń ústine oblys bıýdjetiniń kiris bóligi res­pýblıkalyq bıýdjetten túsetin túsimderge táýeldilikten aryla al­maı keledi. 

Otyrysta baıandama jasaǵan Esep komıtetiniń múshesi Ra­shıt Ahmetovtiń aıtýynsha, aýdı­tor­lar 2016-2017 jyldary res­pýb­lıkalyq bıýdjetten 37 mlrd teńge bólingen 10 nysandy tek­sergen. Olardyń qorytyn­dysy boıynsha júıeli qaıtala­natyn kemshilikter, bıýdjet ákim­shileri baqylaýynyń jetkizilik­sizdigi saldarynan 468 mln teń­geniń qarjylyq buzýshylyqtary anyqtalǵan. Memlekettik aýdıtorlar, sondaı-aq bıýdjettiń 1 mlrd 119 mln teńgesiniń tıimsiz paıdalanylǵanyn, al 15 mln teńgeniń tıimsiz josparlanǵanyn jáne 174 rásimdik qatelikterdi anyq­taǵan. 

– 2017 jyly respýblıkalyq bıýdjetten Aqtóbe oblysyna qar­jylyq kómektiń sýbvensııa tú­rinde ulǵaıý úderisin atap ótý kerek. Bul kómek ótken jyly 2016 jylmen salystyrǵanda 6 ese ósken. Alaıda osy qarjyny jum­saýda jergilikti bıýdjetten qosa qarjylandyrý talaptary saq­tal­maǵan, – dedi R.Ahmetov. 

Oǵan qosa birqatar bıýdjettik baǵdarlamalardy eseptik kezeńniń sońyna taıaý qarjylandyrý beleń alǵan. Osynyń nátıjesinde mer­diger kompanııalarǵa is júzin­de istemegen jumysy úshin qar­jy tóleý derekteri anyqtalǵan. Má­selen, Hromtaý aýdanynyń turǵyn úı-kommýnaldyq sharýashylyq bólimi ótken jyldyń sońynda 119,9 mln teńgeni jol salýshy merdigerler esebine istelmegen jumys úshin aýdara salǵan. 

Al Qobda aýdandyq turǵyn úı-kommýnaldyq sharýashylyq bólimi Taldysaı jáne I.Bil­tabanov atyndaǵy eldi mekender­ge aýyz sýmen jabdyqtaý nysandaryn salýshy «KTP» seriktestigine de jumystar tolyq istelmeı jatyp 23,7 mln teńgeni zańsyz aýdarǵan. 

Sonymen qatar «Shubarqudyq-Oıyl-Qobda-Sol-Ilesk» av­to­kólik jolynyń 267-307 sha­qy­rymdaryna jóndeý júrgizgen osy «KTP» seriktestigi jobalyq-sme­talyq negizdemeden aýytqysa da, bıýdjet ákimshileri bul qatelikke kóz juma qarap, shala bitken ju­mys qabyldanyp ketken. 

Komıtet basshylyǵy 2016 jyldan bastalǵan 300 tósektik tý­berkýlezge qarsy kúres dıs­pan­seriniń qurylysy ýaqytsha toq­tatylǵanymen, qurylys bas­qar­masy osyny bile tura merdi­ger esebine 1 mlrd 115,5 mln teń­geni aýdaryp jibergendigin de anyq­taǵan. 

Esep komıtetiniń esebindegi jarııa etilgen basqa da kemshilikter boıynsha Aqtóbe oblysy ákiminiń orynbasary Oljas Smaǵulovtyń aqtalýyna týra kelip, komıtet músheleriniń saýaldaryna jaýap berdi. Atap óterligi, oblys áki­mi orynbasarynyń oryn alǵan kem­shilikter boıynsha jaýapty tul­ǵalardyń búginge deıin qyzmet aýys­tyryp ketkendigin aıtyp aq­tal­ǵan jaýaby Esep komıteti tór­aǵ­asynyń kóńilinen shyqqan joq. 

Jalpy oblys ákiminiń oryn­basaryna Respýblıkalyq bıýd­jettiń atqarylýyn baqylaý jó­nindegi esep komıteti anyqtaǵan kemshilikterdi joıýǵa ýaqyt be­rildi. 

Al memlekettik aýdıttiń jekelegen materıaldary quqyq qorǵaý organdaryna joldanbaq.