ÝEFA Eýropa lıgasynda synǵa túsip jatqan Almatynyń «Qaırat» komandasy atalǵan týrnırdiń ekinshi irikteý kezeńniń syrt alańda ótken qarymta kezdesýde «AZ Alkmaar» komandasymen kezdesip, 1:2 esebimen jeńilip qaldy. Degenmen, eki oıyn qorytyndysy boıynsha «Qaırat» kelesi kezeńge ótti.
Syrt alańdaǵy match á degennen-aq alma-kezek shabýylmen bastaldy. Onysy túsinikti edi. Eger alań ıeleri jyldam gol soǵatyn bolsa, kelesi kezeńge ótý múmkindikteri joǵarylaıdy. О́ıtkeni «AZ Alkmaar» Almatyda gol soqqan joq. Al «Qaırat» gol soǵatyn bolsa, onda bizdiń komanda kelesi kezeńge joldama alady.
Degenmen, oıyndaǵy alǵashqy goldy otandastarymyz soqty. Birinshi taımnyń 28-mınýtynda qarsylas komandanyń qaqpashysy «Qaırat» shabýylshysy Adersınsola Eseolany óz aıyp alańynda qulatyp, tóreshi 11 metrlik aıyp dobyn belgiledi. Al komanda kapıtany Baýyrjan Islamhan bul múmkindikti tıimdi paıdalanyp, komandasyn alǵa shyǵardy. Birinshi taım bitýge 3 mınýt qalǵanda alań ıeleri esepti teńestirip ketti. Esep – 1:1.
Al ekinshi taımnyń sońynda «AZ Alkmaar» gol soǵyp, esepti 2:1-ge jetkizgenimen, kelesi kezeńge óte almady. О́ıtkeni, Almatydaǵy alǵashqy oıyn 2:0 esebimen «Qaırattyń» paıdasyna sheshilgen edi. Eki oıyn qorytyndysy boıynsha 2:3 nátıjesimen «Qaırat» úshinshi kezeńge shyqty. Endi Almatynyń komandasy Eýropa lıgasynyń úshinshi irikteý kezeńinde Chehııanyń «Sıgma» komandasymen kezdesedi.