Golden Boy Promotions kompanııasynyń prezıdenti Erık Gomes 15 qyrkúıekke josparlanǵan Gennadıı Golovkın men Saýl «Kanelo» Alvarestiń kezdesýine bıletter túgeldeı satylýǵa shaq qalǵanyn málim etti.
15 qyrkúıekte Las-Vegastegi T-Mobile arenasynda ótetin GGG men Kanelo arasyndaǵy jekpe-jekke bıletter sany az qaldy. Golden Boy Promotions kompanııasynyń prezıdenti Erık Gomestiń aıtýynsha, satylymda nebári 2000-nan astam bılet qalǵan. Uıymdastyrýshylar aıqasqa eki aı qalǵanda barlyq bıletteri túgeldeı satylyp ketken birinshi kezdesýmen salystyra otyryp, anderkard quramy belgili bolǵan boıda rematchtyń bıletterin qyrkúıektiń basyna deıin satyp jiberýge úmittenip otyr.
«Bıletter óte jaqsy satylyp jatyr, eki myńnan astam bıletimiz ǵana qaldy. Qazir tek jarnamalaý kezeńi júrip jatyr, sondyqtan barlyq bıletterdi osy aıdyń aıaǵyna deıin nemese kelesi aıdyń basyna deıin satýdy josparlap otyrmyz. Bizge kóp saıystarmen básekege túsýge týra kep tur. Jaqynda ǵana álem chempıonaty (fýtboldan - avt.) aıaqtaldy, alda áli UFL, beısboldan Meıdjer lıga jáne basqalary bar. Bıletter aıqasqa 1 aı qalǵanda belsendi túrde satyla bastaıdy. Biz 17 500-den astam bılet satyp úlgerdik», - dedi Gomes ESPN Deportes arnasyna bergen suhbatynda.
Golovkın men Alvarestiń alǵashqy kezdesýinen túsken tabys bıletterdiń satylý tarıhynda úshinshi boldy. Jekpe-jekke satylǵan 19 318 bıletten 27 mıllıon dollar túsken. Buǵan deıin Floıd Meıvezerdiń Mennı Pakıaomen ótken kezdesýine 16 219 bılet satylyp, 72 mıllıon qarjy túsken edi. Odan keıin boksshynyń Konor Makgregormen jekpe-jegine 13 094 bılet satylyp, 55 mıllıon óndirildi.