Jýyqta Astanada ornalasqan Qoljazbalar jáne sırek kitaptar ulttyq ortalyǵynda Qostanaı oblystyq Altynsarın atyndaǵy memorıaldyq mýzeı qorynan jádigerler ákelip, kórme uıymdastyrdy.
Atalmysh kórme tórine qoıylǵan jádigerler arasynan shaqshaq Jánibektiń nemeresi Yrǵyz-Torǵaı óńiriniń ataqty bıi Shegen Musaulynyń shapanyn kórip kózaıym boldyq. Bul murany mýzeıge eki jyldyń aldynda bıdiń bir balasy Bektemisten taraǵan tuqym-juraǵaty hám baıyrǵy jýrnalıst Saǵı Ábilhasenuly tapsyrǵan eken. Shapan sur tústi, jolaqty kenep matadan tigilip, kıiminiń syrtynan jelbegeı jamylýǵa arnalǵan sııaqty. О́ıtkeni shapan astarlanbaǵan ári qaýsyrma jıegi altyn tústes sary jippen kómkerilipti.
Aǵartýshy Altynsarınnyń ómir-tarıhyn zertteýshiler jaqsy biledi – Ybyraı atamyz osy Shegen bıdiń úlken qyzy Aıǵanystan týady. Iаǵnı týǵan jıeni. Ybyraıdy Torǵaıǵa shaqyryp, mektep ashyp, bala oqytýyna kómek bergen de osy kisi. Altynsarın atamyz óz estelikterinde naǵashy atasynyń mektep ashýǵa qalaı kómekteskeni jaıly asa bir maqtanyshpen áńgimeleıdi. Tipti «Naǵashy ata» deıtin jazbasynda Shegen bı aıtty degen keremet, ulaǵatty oılar tizbegin keltiredi.
Shegen bı zamanynda ozyq oıly adam bolǵan. Zertteýshi Ertaı Qarabalanyń jazýynsha, bul kisi qaıtpas er minezimen, batyrlyǵymen, el bıleýdegi ádildigimen, sheshendigimen de tanylǵan tulǵa dese, alash rýhty aqyn Hamıtbek Musabaevtyń: «Kókiregin kúıdirse de sher-shemen, Kisilikti adaldyqpen ólshegen, Aıyr tildi abyz bıdiń bireýi, Jánibek tarhan shóberesi er Shegen» degen jyry bar.
Ybyraı alǵash mektep ashqanda oqýǵa barǵan 11 shákirttiń tórteýi osy Shegen bıdiń tikeleı urpaqtary. Iаkı bıdiń úlken uly Birimjannyń balalary Qorǵanbek pen Ábdibek, taǵy bir uly О́tetileýden týǵan nemeresi Haırolla men Bektemis deıtin ulynyń balasy Omarlar eken.
Osylardyń ishinde Birimjanovtar áýleti óz aldyna jeke dınastııa. Aıtalyq Orynbor gımnazııasyn, Qazan ýnıversıtetiniń zań fakýltetin Lenınmen birge oqyp, altyn medalmen bitirgen alash qaıratkeri Ahmet Birimjanov, Alashordanyń belsendi múshesi Ǵazymbek Birimjanov, Ybyraıdyń isin jalǵastyrýshy ustaz-aǵartýshylar – Ábdibek, Qorǵanbek, Dáýrenbek Birimjanovtar. Bulardyń sońǵysy hımııa ǵylymdarynyń doktory Batyrbek Birimjanovpen tuıyqtalyp tur.
Beken QAIRATULY,
«Egemen Qazaqstan»