Memlekettik hatshy Gúlshara Ábdiqalyqovanyń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótti.
Jıyndy ashqan Memlekettik hatshy Elbasy N.Nazarbaevtyń «Ulttyq adamı kapıtaldyń sapasy álemdik ekonomıka ósiminiń basty faktoryna aınalyp otyr. Jańa zaman adamdarynyń daıyndyq deńgeıi – ulttyq ekonomıka men memleket damýynyń sheshýshi resýrsy» degen sóziniń ózektiligine nazar aýdardy.
Gúlshara Ábdiqalyqova bıyl 25 jyldyǵyn atap ótetin «Bolashaq» baǵdarlamasy joǵary bilikti mamandar daıyndaý isine mańyzdy úles qosyp kele jatqanyn, osy ýaqyt ishinde 13 myńǵa jýyq stıpendııa bólinip, 10 myńnan astam bilikti kadrlar daıarlanǵanyn jáne olardyń el ekonomıkasynyń túrli salalarynda jumys istep júrgenin atap ótti.
«Bolashaq» baǵdarlamasynyń tıimdiligin baǵalaý maqsatymen Nazarbaev Ýnıversıtettiń bir top ǵalymy baǵdarlamaǵa ekonometrııalyq saraptama júrgizdi. Osy zertteý jumysy salynǵan ınvestısııanyń materıaldyq jáne materıaldyq emes ıgiligin qamtamasyz etý isinde «Bolashaq» stıpendııasynyń tıimdi ekenin kórsetti. El ekonomıkasynyń barlyq sektory úshin joǵary synypty mamandar daıyndaldy. Máselen, baǵdarlamanyń kardıohırýrgııa salasynyń túlekteri 32 myńnan asa tegin ota jasady. Bir otanyń ortasha baǵasy 300 myńnan 10 mıllıon teńgege deıin jetedi.
Basqosýda Bilim jáne ǵylym mınıstrligi Shetelde kadrlar daıarlaý jónindegi respýblıkalyq komıssııanyń hattamalyq tapsyrmalarynyń oryndalýy týraly málimdedi.
Komıssııa sheshimimen magıstratýrada, doktorantýrada oqýǵa, sonymen qatar álemniń jetekshi ǵylymı jáne óndiristik ortalyqtaryna taǵylymdamadan ótýge jiberiletin 128 úmitkerge stıpendııa taǵaıyndaldy.
Jıyn qorytyndysy boıynsha Qazaqstan Respýblıkasynyń Memlekettik hatshysy Gúlshara Ábdiqalyqova «Bolashaq» halyqaralyq stıpendııasyn iske asyrýdy odan ári jalǵastyrý jóninde birqatar tapsyrma berdi.
Abaı ASANKELDIULY,
«Egemen Qazaqstan»