Áset Isekeshev qoǵamdyq kólik máseleleri týraly jınalys ótkizdi, dep habarlaıdy Astana ákimdiginiń baspasóz qyzmeti.
Jıynda qala basshysy qala ákimi orynbasarynyń, Kólik jáne jol-kólik ınfraqurylymyn damytý basqarmasynyń, «Astana LRT» JShS men astanalyq avtobýs parkteriniń jumysyn qatań synǵa aldy.
«Barlyq máselelerdi oqý jyly bastalǵansha sheshý kerek. Valıdatorlardyń jumys istemeýinen adamdar avtobýs kútip turmaýy kerek», - dedi Áset Isekeshev.
Elorda basshysy barlyq valıdatorlardyń jumysyn retteýdi tapsyrdy. Al olar isten shyqqan jaǵdaıda avtobýsty kúttirip qoımaı, barlyq jolaýshylar tegin júrýi tıis ekenin aıtty.
«Valıdatorlar turaqty jumys istemese, jolaýshylardy tegin tasyńdar», dedi Áset Isekeshev.
Qala ákimi avtobýs qozǵalysyn baqylaýǵa arnalǵan GPS monıtorınginiń jumys istemeıtinin, munyń jolaýshylarǵa qolaısyzdyqtar týdyratynyn atap ótti. Elektrondyq tablodan aıyrmashylyq 3-5 mınýttan aspaýy kerek.
Sondaı-aq, ákim «Astana LRT» JShS-ge tamyz aıynyń sońyna deıin jolaqyny QR kod, smartfon jáne ınternet-bankıng arqyly tóleýge múmkindik beretin qosymsha múmkindikter ázirleýdi tapsyrdy. О́z kezeginde avtopark ókilderi elektrondy tólemdi engizý arqyly qarjy aınalymynyń 30% artqanyn, bul qarajatqa qyzmet kórsetý sapasyn jaqsartyp, biliktiligi joǵary júrgizýshilerdi kóbeıtetinin atap ótti.
Elektrondy tólemniń arqasynda júrgizýshilerdiń eńbekaqysy 300-400 myń teńgege deıin artqan. Sondaı-aq, avtopark basshylary qoǵamdyq kólikte bıletsiz jolaýshylardyń sany artqanyn, máseleni sheshý úshin kóliktik ınspeksııa men jergilikti polısııa qyzmetiniń kómekke kelýin surady.