Oblys ortalyǵyndaǵy 20-shy yqsham aýdanda 630 adamǵa arnalǵan meshit úıi paıdalanýǵa berildi.
Meshittiń ashylý saltanatyna Qazaqstan musylmandary dinı basqarmasynyń tóraǵasy, bas múftı Serikbaı qajy Oraz, aımaq basshysy Qumar Aqsaqalov, Parlament Senatynyń depýtaty Erik Sultanov, Májilis depýtaty Abaı Tasbolatov, respýblıkamyzdyń ózge óńirlerinen, Reseıdiń shekaralas aımaqtarynan qonaqtar qatysty.
Jınalǵan qaýym aldynda Qumar Irgebaıuly, Erik Hamzauly sóz sóılep, eńseli meshittiń boı kóterýi musylmandar jamaǵaty úshin aıtýly oqıǵa sanalatynyn, bir shańyraq astynda turyp jatqan túrli dinı konfessııalardyń tilegi el birligi ekenin jetkizdi. Bas múftı S. Oraz ǵıbadathanaǵa qasıetti Quran-Kárimdi tartý etti. «Qyzyljar ortalyq meshitiniń» naıb ımam qyzmetin atqaryp kelgen Qasymhan qajy Isaevtyń bas ımam bolyp taǵaıyndalǵanyn jarııa etti. «Aq nıet» qoǵamdyq qory qamqorshylyq keńesiniń tóraǵasy Qudaıbergen Qalıev 1,4 gektar jer bólinip, qurylys jumystaryna jekelegen adamdar, kásipkerler, kásiporyndar qarajatpen kómektesip, saýapty is atqarǵandaryn aıtty.
Jobanyń avtory ári bas sáýletshisi Saǵyndyq Janbulovtyń aıtýynsha 2,7 myń sharshy metr aýmaqta ornalasqan ǵımaratty salýda biregeı sáýlet úlgisi basshylyqqa alynǵan. Dástúrli musylmandyq jáne qazaqy elementter toǵysqan. Ishi-syrty oıý-órnektermen áshekeılengen. Aqshyl sary túspen boıalyp, qaladaǵy aıshyqty orynǵa aınalǵan. Úsh deńgeıli, altyn tústes kúmbezder men bıiktigi 33 metrdi quraıtyn sımmetrııalyq kópqyrly tórt munarasy, neke qııý zaly, avtoturaq, 500 oryndy ashana, dinı rásimder oryndalatyn arnaıy oryndar bar.
Aldaǵy ýaqytta meshittiń mańaıyna sýburqaq ornatylyp, kishi saıabaq ashylyp, abattandyrylatyn bolady.
О́mir ESQALI
«Egemen Qazaqstan»
Soltústik Qazaqstan oblysy.