2018 jyldyń 2 qyrkúıeginde Venesııada qazaqstandyq jańa kartınalardyń tanystyrylymy bolady. «Eýrazııa» Halyqaralyq kınofestıvaliniń dıreksııasy uıymdastyrǵan is-shara Italııanyń kınematografııalyq, aýdıovızýaldy jáne mýltımedıalyq ónimderiniń ulttyq assosıasııasynyń (ANICA) qoldaýymen júzege asyp otyr.
«Qazaqstandy ash: aýdıovızýaldy damytýǵa arnalǵan jańa múmkindikter» atty is-sharada mynadaı kartınalardyń treılerleri kórsetiledi: «О́zen» (rej. E.Baıgazın), «Árýaq» (rej.H.Ahmetov), «Ámire» (rej. D.Vespa), «Talan» (rej. B.Qalymbetov), «Ol» (rej. A.Sataev), «Almas qylysh» (rej. R.Ábdrashev), «Anaǵa aparar jol» (rej. A.Sataev), «Oralman» (rej. S.Qurmanbekov), «Bizdiń qalanyń kishkentaı hanzadasy» (rej. T.Temenov), «Shyńyraý» (rej. J.Jetirýov), «Jat» (rej. E.Tursynov). Budan bólek «Kúltegin» (rej. A.AÁbildınov), «Jumper» (rej. ArmanBeısembaev) jáne «Muzbalaq» (rej. T.Maıdan, T.Tóleýǵazy) syndy anımasııalyq fılmderdiń treılerleri kórsetiledi.
Halyqaralyq «Eýrazııa» kınofestıvaliniń prezıdenti Aıman Musaqojaeva bul shara jaıynda: «Bul shara bizdiń kınomyz ben mádenıetimizdiń damýyna áser etetindikten, qazaq kınematografısteri men mádenıet qaıratkerleri úshin óte mańyzdy oqıǵa bolyp otyr. Osyǵan oraı, men kórkem ónerdi baǵalaı biletin Venesııa qalasyna shaqyryp, bizdiń kınematografııamyzdy tanystyrýǵa múmkindik bergeni úshin ıtalııalyq ANICA halyqaralyq departamentiniń basshysy Roberto Stabılege alǵysymdy bildiremin. Bizdiń sharamyz tarıhy tereń jáne bedeldi kınofestıvalderdiń biri Venesııa kınofestıvali ótip jatqan ýaqytta ótkizilip jatqany kóńil qýantady,» - dep aıtty.
Sondaı-aq, shara barysynda QR Mádenıet jáne sport mınıstriligi quryltaıshysy bolyp tabylatyn «Eýrazııa» kınofestıvali tanystyrylady. «Eýrazııa» – Halyqaralyq kınoóndirýshiler qaýymdastyǵy (FIAPF) akkredıtasııasynan ótken Ortalyq Azııadaǵy eń iri kınoforým.
Venesııaǵa baratyn delegasııa quramynda Bolat Qalymbetov, Toqtar Qarsaqbaev, Talǵa Temenov bastaǵan rejısserler men akter Sanjar Madıev jáne ózge de kıno salasynyń mamandary bolady. Delegasııanyń quramynda Eýrazııalyq joba naryǵynda júldeli ekinshi oryn alǵan (júlde – «A» sanatyndaǵy kınofestıvalge joldama) jas rejısser Ashat Kýchıncherekov te bar. Eurasia Film Market halyqaralyq kıno naryǵy 2018 jyldyń shilde aıynyń 1 men 4 aralyǵynda XIV halyqaralyq «Eýrazııa» kınofestvaliniń aıasynda Astana qalasynda ótkenin esterińizge salamyz.
75-i Venesııa kınofestıvaliniń «Kókjıek» atty konkýrstyq baǵdarlamasynda Qazaqstan atynan Emır Baıgazınniń «О́zen» kartınasy qatysady. Bul kartına QR Mádenıet jáne sport mınıstrliginiń tapsyrysymen «Qazaqfılm» AQ, Emir Baigazin Production-de túsirilgen. Budan bólek, rejısser Eldar Shıbanovtyń «Seks, qorqynysh jáne gambýrgerler» atty 19 mınýttyq kartınasy da kınofestıvaldiń negizgi baǵdarlamasynyń qysqa metrajdy fılmder seksııasynda baıqaýǵa qatysatyn bolady.