Jyl saıyn dástúrli túrde ótetin oblystyq tamyz keńesinde óńirdegi úzdik muǵalimdermen qatar aımaqtaǵy úzdik bilim ordasy da anyqtalatyny belgili. Bıyl Aıagóz qalasyndaǵy №5 orta mektep ujymy oblystaǵy jyldyń úzdik bilim berý mekemesi atanyp, óńir basshysy Danıal Ahmetovtiń qolynan 22 mln teńgeniń sertıfıkatyn saltanatty túrde alǵan bolatyn.
Bul mektep nesimen ózgeshe? О́zgeshiligi sol, 53 jyldyq tarıhy bar oqý orny zaman talabyna saı ınnovasııalyq, modıfıkasııalyq quraldarmen tolyq jabdyqtalǵan. Mundaǵy túlekter attestatpen qatar kólik júrgizý daǵdylaryn da úırenip, kýálik alyp shyǵady. Múmkindikteri shekteýli balalardy jalpy bilim úrdisine tolyq engizý jáne áleýmettik beıimdeýge baǵyttalǵan ınklıýzıvti synyptar da jumys isteıdi. Árıne, 22 mıllıon teńge az aqsha emes. «Bul qarajat qalaı jumsalady eken?» dep qyzyǵýshylyq tanytyp otyrǵan jandar da joq deýge bolmas. Osy saýaldy biz mektep dırektory Aınur Qanapıanovanyń ózine qoıdyq. «Bul qarajatty mekteptiń materıaldyq tehnıkalyq bazasyn nyǵaıtýǵa jumsaımyz. Biz sońǵy úsh jyl ýaqyt aralyǵyndaǵy atqarǵan jumystarymyzdyń qorytyndysymen osyndaı jetistikke jettik. Qańtar aıynan bastap oqý, tárbıe, oqýshylardyń jetken jetistikteri, ǵylymı jumystaryn saraptap, jınap sáýir aıynda baıqaýǵa tapsyrdyq. Qorytyndysyn estigende qýanyshymyzda shek bolmady», - deıdi mektep dırektory.
Búginde mektepte 1040 bala oqıdy, 105 muǵalim eńbek etedi.
Azamat QASYM,
«Egemen Qazaqstan»
Shyǵys Qazaqstan oblysy,
Aıagóz aýdany
Sýretti túsirgen – Tileýbek ShAIаHMET