Astanada Nursultan Nazarbaev «Beıbitshilik qabyrǵasy» monýmentiniń ashylý saltanatyna qatysty.
«Beıbitshilik qabyrǵasy» monýmenti Aqtóbe oblysynyń Astana qalasynyń 20 jyldyǵyna arnalǵan tartýy. Monýment Táýelsizdik alańynyń kórnekti tusyna, «Qazaq eli» monýmentine jaqyn jerde salynǵan.
Beıbitshilik qabyrǵasy birtutas biriktirip, qorǵap turatyn japyraq tárizdes shatyrdy beıneleıdi. Metall men tabıǵı tastan turǵyzylǵan keshen úsh bólikten turady.
Birinshi bóligi - bólshekteý men oqshaýlaýdy, ekinshi bóligi - úmit, erkindik pen táýelsizdikti, úshinshisi beıbitshilik pen ultaralyq kelisimdi saqtaý jolyn beıneleıdi. Monýmenttiń jalpy uzyndyǵy - 111 metr, eni - 18,4 metr, bıiktigi 17,5 metr. «Beıbitshilik qabyrǵasynyń» turqy tózimdi ári berik temirden jasalǵan. Monýmentti turǵyzýǵa jalpy aýmaǵy 6 myń tekshe metr bolatyn 1200 tonna granıt paıdalanylady. Memorıalda álemniń 51 tilinde «Beıbitshilik» degen sóz jazylǵan.
Avtorlar jobanyń kórnekti mazmunǵa ǵana emes, onyń fýnksıonaldyǵyna da jiti mán bergen. Aspaly shatyrdyń ashyq panelderi 2,5 mıllıon jaryq núktesi bar 616 tekshe metrdi alyp jatqan LED-júıege ıe. Ol kez kelgen úlken kólemdegi sandyq dúnıeni taratýǵa múmkindik beredi. Ekranǵa shyǵarý eýropalyq ónim óndirýshilerdiń eń sońǵy úlgidegi vıdeo, aýdıo jáne kommýtasııalyq jabdyqtar ornatylǵan serverlik bólmelerde júzege asyrylady.
Sol sebepti bul tańǵajaıyp art-nysan - saıası, mádenı-buqaralyq, aqparattyq sharalardy, lazerlik jáne basqa shoýlardy ótkizetin tamasha orynǵa aınalmaq. Nysandy turǵyzý ketken qarjy quny - 1,8 mıllıard teńge. Al oǵan Aqtóbe oblysy aýmaǵynda jumys isteıtin kompanııalar demeýshilik etti.