Oral qalasynda Qazaqstan Respýblıkasynyń Konstıtýsııasy kúnine oraı ótken saltanatty jıynda bir top qoǵam belsendileri men ardagerler mereıtoılyq nagradaǵa ıe boldy. Marapatty Batys Qazaqstan oblysynyń ákimi Altaı Kólginov tabys etti.
- Sizderdi elimizdiń qasterli merekeleriniń biri – Konstıtýsııa kúnimen shyn júrekten quttyqtaımyn! Elbasy Nursultan Ábishuly Nazarbaev aıtqandaı, «Bizdiń basty paryzymyz – Konstıtýsııaǵa uqypty qarap, óz elimizdi, tarıhymyzdy qalaı qurmettesek, ony da solaı qurmetteýimiz qajet». Konstıtýsııa qoǵamnyń dınamıkalyq damýynyń faktoryna aınaldy. Eń bastysy, Táýelsiz Qazaqstannyń tıimdi damýyn qamtamasyz etti. Munyń ózi bizdiń Ata Zańymyzda búkil adamzattyq qundylyqtar men órkenıettik ıgilikterdiń qamtylǵanyn aıǵaqtaıdy. Konstıtýsııa myzǵymas memleketimizdiń altyn qazyǵy bolǵandyqtan, barshamyz elimizdiń búgini men bolashaǵy úshin Ata Zańymyzdy qurmettep, qorǵap jáne mańyzdylyǵyn joǵaltpaı saqtaýǵa tıispiz. Aıbarly asqar eldi asqaqtatar Ata Zańymyzdyń merekesi qutty bolsyn! - dedi Altaı Kólginov.
Saltanatty jınalys aıasynda Altaı Kólginov bir top qoǵam belsendileri men eńbek ardagerlerin «Astanaǵa – 20 jyl» merekelik medalimen marapattady. Qazaqstan Respýblıkasynyń jáne onyń astanasynyń qalyptasýy men damýyna qosqan eleýli úlesi úshin Ǵarıfolla Qurmanǵalıev atyndaǵy Batys Qazaqstan oblystyq fılarmonııanyń ánshisi Hatımolla Berdiǵalıev, eńbek ardagerleri Sofıa Imanǵalıeva, Roza Kójekova, Klara Sarjanova, Nábııa Seıtqalıeva, Bátes Ysmaǵulova, Batys Qazaqstan oblystyq máslıhat hatshysy Málik Qulshar, Batys Qazaqstan oblystyq aýrýhananyń emhana meńgerýshisi Sergeı Melnıkov, Hadısha Bókeeva atyndaǵy Batys Qazaqstan oblystyq teatrynyń akteri Serdesh Qajymuratov, «Otdelstroı» JShS qurylys kompanııasynyń dırektory Valentına Mıhno, «BQO úkimettik emes qoǵamdyq ǵylymı uıymy» qoǵamdyq birlestiginiń tóraıymy Zahot Muhlısova, «Batys Qazaqstan mashına jasaý kompanııasy» JShS bas dırektory Dáýren Sısenov, Krýgloozernyı arnaýly áleýmettik qyzmet kórsetý ortalyǵy medısına bóliminiń meńgerýshisi Farzana Ysqaqovalar marapattaldy.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Temirbolat TOQMÁMBETOV