«Taraz-Arena» sport kesheninde Qazaqstan ulttyq quramasyn III Dúnıejúzilik kóshpendiler oıyndaryna shyǵaryp salý rásimi boldy, dep habarlaıdy QR Mádenıet jáne sport mınıstrliginiń baspasóz qyzmeti.
2-8 qyrkúıek aralyǵynda Qyrǵyzstannyń Sholpan ata qalasynda ótetin III Dúnıejúzilik kóshpendiler oıyndaryna Qazaqstan quramasy saqadaı daıyn. Búgin «Taraz-Arena» sport kesheninde sportshylardy shyǵaryp salý rásimi ótti. Sharaǵa Sport jáne deneshynyqtyrý komıteti tóraǵasynyń orynbasary Bekbolat Baıjanov, Jambyl oblystyq sport basqarmasynyń basshysy Nurbol Júnisbekov, sondaı-aq belgili qazaqstandyq sportshy Aqjúrek Tańatarov qatysty. B. Baıjanovtyń aıtýynsha, Qazaqstan quramasy oqý-jattyǵý jıyndaryn ótkizgen, saıystarǵa saqadaı saı tur.
Olımpıada oıyndarynyń qola júldegeri Aqjúrek Tańatarov Qazaqstan Respýblıkasynyń Memlekettik týyn aýdaryspaqtan Azııanyń úsh dúrkin chempıony Syrym Izbasarovqa saltanatty túrde tapsyrdy.
37 ulttyq sport túrinen ótetin dúbirli dodada álemniń 80 elinen jınalǵan úsh myńǵa jýyq sportshy qatysady. Qazaqstannan eki júzge jýyq sportshy barady.
Qazaqstan Dúnıejúzilik kóshpendiler oıyndaryna alǵash ret ótkizilgen 2014 jyldan beri qatysyp keledi. Sol joly qazaqstandyqtar 11 altyn, jalpy 28 medal alyp, 18 eldiń arasynda ekinshi oryndy ıelengen bolatyn.
2016 jyly uıymdastyrylǵan II Dúnıejúzilik kóshpendiler oıyndaryna 63 elden myńnan astam sportshy qatysty. Qazaqstan sporttyń 22 túrinen 13 altyn, jalpy 39 medal alyp, jalpy esepte úshinshi oryndy ıelendi.