Túrkitildes memleketteri yntymaqtastyq keńesiniń sammıtinde sóz sóılegen Elbasy Nursultan Nazarbaev túrki áleminiń kıeli jerlerin anyqtap, jastar saıasatyn jandandyrýdy usyndy.
«Altaıdan Anadolyǵa, Baıkaldan Balqanǵa deıingi, Saharada baıyrǵy bahadúr babalarymyzdyń izderi saırap jatyr. Túrki halyqtary úshin qasıetti uǵymdardy kózimizdiń qarashyǵyndaı saqtap, keıingi urpaqqa laıyq etip qaldyrý úshin Túrki áleminiń kıeli jerleri jobasyn qolǵa alýdy usynamyn. Joba túrki áleminiń mádenıeti men tarıhyn nasıhattaýǵa zor úles qosatynyna senimdimin», dedi Elbasy.
Sondaı-aq jastar jumysyn jandandyrýdy Túrki keńesiniń júzege asyrýyn usyndy.
«Jastar saıasatyna qatysty jumystardy jandandyrǵan jón. Joba aıasynda ǵylymı konferensııalar, semınarlar jáne basqa da is-sharalar ótkizýdi qarastyrýǵa bolady. Budan bólek, jastardyń túrki álemin biregeı tarıhı jerlerge ólketaný ekspedısııasyn uıymdastyrýdy oılastyrý qajet», dedi N.Nazarbaev.
Abaı ASANKELDIULY,
"Egemen Qazaqstan"