Fýtzaldan Chempıondar lıgasynyń negizgi kezeńinde kúsh synasatyn Almatynyń «Qaıraty» men «Aqtóbe» klýbtarynyń qarsylastary anyqtaldy.
Tórtinshi topta kúsh synasatyn «Qaırat» Portýgalııanyń «Sportıngi», Belarýstiń «Lıdasy» jáne Kosovonyń «Fenıskine» qarsy oınaıdy. Osylardyń arasynda jerlesterimiz úshin eń qaýipti qarsylas – «Sportıng». О́z eliniń ishki birinshiliginde 10 márte top jarǵan Pıreneı túbeginiń túlekteri ÝEFA kýbogy jolyndaǵy jarysta úsh ret kúmis alsa (2011, 2017, 2018), eki márte qola medaldi (2002, 2015) ıelendi. 2011 jyly Almatyda ótken dál osy jarystyń jartylaı fınalynda olar «Qaırattan» 3:2 esebimen basym túsken bolatyn. Bul básekeler 3-6 qazan aralǵynda Kosovoda ótedi.
Altynshy topta óner kórsetetin «Aqtóbe» Horvatııanyń «Novo Vrıeme» Fınlıandııanyń «Kampýksen Dıýnamo» jáne Grýzııanyń TMS klýbtarymen kezdesedi. Bul oıyndar 3-6 qazan aralǵynda Horvatııada ótedi.
Bir ekeretin jaıt, tórtinshi topta alǵashqy úsh orynyn ıelengen komandalar elıtalyq dıvızıonǵa joldama alsa, altynshy toptaǵylar arasynan jalǵyz ǵana ujym sondaı múmkindikke ıe bolady.
Ǵalym SÚLEIMEN,
«Egemen Qazaqstan»
ALMATY