24 qyrkúıekte Londonda ótetin FIFA The Best keshinde 2018 jyly soǵylǵan eń ádemi goldyń avtory anyqtalady. Sol atalym boıynsha jeńimpaz atanǵan oıynshyǵa saltanatty túrde Ferens Pýshkash atyndaǵy júlde tabys etiledi.
Ferens Pýshkash óz dáýiriniń teńdessiz fýtbolshylarynyń biri bolǵany barshaǵa málim. Vengrııa quramasy sapynda ol 1952 jyly Olımpııa oıyndarynyń jeńimpazy, 1954 jyly álem chempıonatynyń kúmis júldegeri atandy. О́z eliniń namysyn qorǵaǵan 11 jyl aralyǵynda 85 ret jasyl alańǵa shyǵyp, 84 márte nysany dál kózdedi. «Gonved» klýbynda 13 jyl boıy oınap, 354 kezdesýde 357 gol soqty. Keıinnen Madrıdtiń «Realy» sapynda 9 jyl óner kórsetip, 180 matchta 155 ret dopty torda týlatty.
Mine, sol surmergenniń qurmetine jyl saıyn FIFA tarapynan eń ádemi goldyń avtoryna arnaıy júlde taǵaıyndalýda. 2009 jyldan beri ol syılyqta Krıshtıaný Ronaldý, Hamıt Altyntop, Neımar, Mıroslav Stoh, Zlatan Ibragımovıch, Hames Rodrıges, Vendell Lıra, Mohd Faız Sýbrı jáne Olıve Jırý syndy sańlaqtar ıelendi.
Bıylǵy jyly Ferens Pýshkash atyndaǵy júldeden úmitkerler qatarynda Garet Beıl («Real» Madrıd), Denıs Cheryshev (Reseı quramasy), Lazaros Hrıstodýlopýlos («Olımpıakos»), Krıshtıaný Ronaldý («Real» Madrıd), Djordjıan de Arraskaeta («Krýzeıro»), Raılı Makgrı («Nıýkasl Djets»), Lıonel Messı («Barselona»), Benjamen Pavar (Fransııa quramasy), Rıkardý Kýarejma (Portýgalııa quarmasy) jáne Muhamed Salah («Lıverpýl») syndy juldyzdar bar. Al solardyń arasynan kimniń ozyp shyǵatynyn 24 qyrkúıekte biletin bolamyz.
Ǵalym SÚLEIMEN,
«Egemen Qazaqstan»