Búgin Úkimet otyrysynda QR Premer-Mınıstri Baqytjan Saǵyntaev Densaýlyq saqtaý mınıstrligine medısınalyq kómektiń sapasyn arttyrý boıynsha qabyldanǵan sharalardyń tıimdi oryndalýyn qamtamasyz etý úshin óńirlermen birlese otyryp jumys jasaýǵa tapsyrma berdi, dep habarlaıdy QR Premer-mınıstrliginiń baspasóz qyzmeti.
Baıandamalardy qaraý qorytyndysy boıynsha, Densaýlyq saqtaý mınıstrliginiń bolashaqta atqarylýy tıis jumystarynyń tásilderi bekitildi. Sóz arasynda Premer-Mınıstr búginde qyrýar jumystar jasalyp jatqanyna qaramastan medısına salasynda áli de kemshin tustardyń bar ekeni atap ótti. Ásirese aýyldy jerlerdiń halqy sapaly medısınalyq qyzmetke jetkilikti túrde qol jetkize almaı otyr. Osyǵan oraı, Densaýlyq saqtaý mınıstrligine óńirlermen birlesip usynylǵan sharalardy tıimdi iske asyrý tapsyryldy.
Astana qalasynda ákimdiktiń bastamasymen «Úıdegi dáriger» jobasy iske asyrylyp jatyr. Jobaǵa sáıkes qaladaǵy turǵyn úı keshenderiniń birinshi qabattarynan shaǵyn AMSK ortalyqtaryn ashylý kózdelip otyr. Búginde qalada osyndaı úsh ortalyq óz jumysyn bastady. Sonymen qatar, 2016 jyldan beri №8 qalalyq emhananyń bazasynda alǵashqy medısınalyq kómek dárigerleriniń praktıkasyn qurý jobasy iske asyrylǵan bolatyn, onda dárigerler toptyq praktıkanyń quryltaıshylary bolyp aıqyndaldy. Jobany iske asyrý nátıjesinde konsýltasııalyq-dıagnostıkalyq qyzmetterdi tutyný 33%-ǵa tómendedi, dárigerler men meıirgerlerdiń jalaqysy 2 esege ulǵaıdy, medısınalyq qyzmet sapasynyń ındıkatorlary 1,5 esege jaqsardy
Sondaı-aq, Baqytjan Saǵyntaev jeke ınvestorlardy tartý arqyly medısına mekemeleriniń sapasyn jaqsartý salasyndaǵy Astananyń oń tájirıbesine nazar aýdaryp, ony basqa oblystardyń da qolǵa alýyn tapsyrdy.
«Dárigerdiń aldyndaǵy uzyn-sonar kezekti múlde azaıtý kerek. Keshe ǵana Soltústik Qazaqstan oblysynda bolyp keldik. Jańadan shaǵyn aýdan boı kóterip jatyr. Buryn ol jerde 600 úı bolsa búginde onyń barlyǵy súrilip, ornyna 2000 páter salynyp otyr. Eger buǵan deıin ol jerdegi emdeý mekemesine 600 otbasy tirkelgen bolsa, búginde olardyń sany 2000-ǵa jetip otyr. Júkteme kóbeıip keledi», — dep QR Premer-Mınıstri, úılerdiń jobalaryn ázirleý kezinde birinshi qabattarda halyqqa arnap emhanalar men balabaqshalardy ornalastyrý máselesine nazar aýdarýdy tapsyrdy. Ári bul jumystar barlyq óńirlerde iske asyrylýy tıis ekenin eskertti.
Baqytjan Saǵyntaev ótken jyly Memleket basshysy Qazaqstan halqyna Joldaýynda densaýlyq saqtaý salasyn qaıta retteý máselesine basa nazar aýdarýdy tapsyrǵanyn eske saldy. Ásirese shaǵyn medısına uıymdaryn qurý jáne salaǵa ınvestısııalar tartý múmkindigi erekshe atalyp ótken edi.
Budan ózge, Densaýlyq saqtaý mınıstrligine Aqparat jáne kommýnıkasııalar mınıstrligimen jáne ákimdiktermen birlesip, medısına salasynda júrgizilip jatqan reformalar, adamdardyń sapaly medısınalyq kómek alýyn jeńildetý úshin engizilip jatqan zamanaýı sıfrlyq tehnologııalar týraly halyqqa túsindirý jumystaryn turaqty negizde júrgizip otyrý tapsyryldy.