«Qazaqtelekom» AQ Eýropa men Azııa arasyndaǵy aqparattyq aǵyndar tranzıtiniń jańa múmkindikterin tanystyrdy. Aqparattyq-kommýnıkasııalyq operator Eýropa, Reseı, Qazaqstan, Túrikmenstan, Iran arqyly ótip, odan ary Parsy shyǵanaǵyna jáne Úndistanǵa baratyn alǵashqy jerústi baǵdarynyń iske qosylýy týraly resmı jarııalady, dep habarlaıdy «Qazaqtelekom» AQ baspasóz qyzmeti.
Qazirgi sýasty kabelderi zaqymdanǵan jaǵdaıda, qalpyna keltirý aıtarlyqtaı ýaqyt qajet etedi. Jańa baǵdar sonyń taptyrmas balamasy bolmaq. Osyǵan baılanysty, Eýropa, QHR, Ońtústik-shyǵys Azııanyń iri operatorlary jańa tranzıttik baǵdardyń iske qosylýyna múddeli bolyp otyr.
Jańa tranzıttik baǵdarǵa «PEARL» (aǵyl. «injý») — Persia Europe Alternative Rapid Link degen ataý berildi. Taǵy bir baǵdardyń iske qosylýy «Qazaqtelekom» AQ-tyń Shyǵys pen Batys arasyndaǵy trafık tranzıti naryǵyndaǵy úlesin arttyrý strategııasyn iske asyrýdyń mańyzdy qadamy bolyp tabylady. Qazirgi kezde «Qazaqtelekom» AQ Ortalyq Azııadaǵy baılanys operatorlaryna tranzıttik trafık usyný naryǵy kóshbasshylarynyń biri bolyp otyr, ol Batys pen Shyǵys arasyndaǵy eń qysqa baǵdarǵa ıe.
«Biz Eýropa men Azııa arasyndaǵy trafıktiń meılinshe ósip kele jatqanyn kórip otyrmyz. Operatorlar servısterdiń burynǵydan da senimdi ári turaqty jumys isteýi úshin qazirgi baǵdarlardyń balamalaryn, jańa múmkindikterdi izdep jatyr. Jańa tranzıttik baǵdar — operatorlar úshin injý-marjan sekildi, óıtkeni ol aqparattyq-kommýnıkasııalar naryǵy úshin jańa múmkindikter esigin ashady», — deıdi «Qazaqtelekom» AQ V2V dıvızıonynyń satý jónindegi dırektory Shyńǵys Saǵyndyq.
Jańa baǵdardyń tanystyrylymy baılanys operatorlarynyń jyl saıynǵy halyqaralyq «GCCM 2018» kórme-konferensııasy aıasynda ótti. Bul shara Almatyda ekinshi ret ótkizilip otyr. Oǵan TMD, Ońtústik-shyǵys Azııa, Eýropa jáne Taıaý Shyǵystyń 110 kompanııasynan 350-den astam ókil qatysty. «GCCM 2018» uıymdastyrýshysy — Carrier Community halyqaralyq telekommýnıkasııa klýby 2008 jyly qurylǵan, qazir onda 2500 baılanys operatory bar. Almatymen qatar, klýb aıasynda osy taqylettes konferensııalar Sıngapýr, Dýbaı, Keıataýn, Berlın, Amsterdam, London, San-Paolo qalalarynda ótkiziledi.