Sporttyń buqaralylyǵyn arttyrý, jurtshylyq arasynda salamatty ómir saltyn nasıhattaý maqsatyn dittegen «Rıng koroli» jekpe-jegi alǵash ret byltyr bastaý alǵan bolatyn. Bul joly óńirimizdiń jeti óńirinen, sondaı-aq Reseı men Qyrǵyzstannan aqtyq saıysqa jasy 35-ten asqan 22 ardager sportshy joldama alyp, ózara kúsh synasty.
Jarystyń bas tóreshisi Vıktor Bespıatovtyń aıtýynsha, sharshy alańda qolǵap túıistiretin boksshylarǵa ulttyq quramaǵa múshe bolmaý, densaýlyǵynyń jaramdylyǵy, jas mólsheriniń shekteýligi sekildi birqatar shart-talaptar qoıylǵan. Bes salmaq dárejesinde jan alyp, jan berisken básekede jurt kútpegen nebir kórinister oryn aldy. Atap aıtqanda, júldeli úshinshi oryn úshin Qyrǵyzstannyń 54 jastaǵy ókili Abdelahad Týrdyogly men 36 jastaǵy batysqazaqstandyq Asylbek Sarmalaev sharshy alańǵa kóterildi. Sońǵysy eki raýnd boıy bastyrmalatyp, biraz soqqy jasap ta úlgerdi. Alaıda Abdelahad kókemiz tis qaqqan sheber eken, kúsh-qýatyn, aıla-tásilin sońyna saqtaǵan bolý kerek, qarsylasynan jeńisti julyp áketti.
Petropavldyq Rýstam Jaqypov pavlodarlyq Asylbek Qalyqovty taza jeńip, 64 kılo salmaq boıynsha alǵashqy «Rıng koroli» atandy. Osydan 17 jyl buryn boks qolǵaptaryn shegege ilgen qaraǵandylyq Qýanysh Isembaev jarysqa jaqsy daıyndyqpen kelgen eken. Myqty qarsylasyn tize búktirip, 75 kılo salmaqta teńdessiz sheber ekenin tanytty. 81 kılo salmaqta Túrkistan oblysynyń ókili Qasymhan Ospanovtyń joly boldy. 91 kılo salmaqta synǵa túsken ekibastuzdyq Ádil Asaýbekov jeńisti ýysynan shyǵarmady. Asa aýyr salmaqta petropavldyq Andreı Beısembaev pen ombylyq Saıran Smaıylov qolǵap túıistirdi. Alań ıesi ótken jyly aqtyq saıysta súringen bolatyn. Bul joly sál-pál basymdylyqpen ashy jeńilistiń esesin qaıtardy.
Jeńimpazdar men júldegerlerge aqshalaı syıaqylar berilip, basqa da marapattar kórsetildi. Qyzyljar jerinde elimiz boıynsha tuńǵysh ret uıymdastyrylǵan halyqaralyq «Rıng koroli» týrnıri oblystyq ákimdiktiń qoldaýymen ótkizilip, dástúrge aınaldyrýdy sport jáne deneshynyqtyrý basqarmasy óz mindetine aldy.
О́mir ESQALI,
«Egemen Qazaqstan»
Soltústik Qazaqstan oblysy