Syrtqy ister mınıstri Qaırat Ábdirahmanov Astana qalasynda ótken «Aýǵanstandaǵy áıelderiniń quqyǵy men múmkindikterin keńeıtý» aımaqtyq konferensııasy aıasynda birqatar kezdesýler ótkizdi.
BUU Bas hatshysynyń Arnaıy ókili, Ortalyq Azııadaǵy preventıvti dıplomatııanyń aımaqtyq ortalyǵynyń basshysy Natalıa Germanmen kezdesý barysynda Qazaqstan men BUU arasyndaǵy yntymaqtastyqtyń ózekti máseleleri talqylandy. Mınıstr aımaqtyq qaýipsizdik, yntymaqtastyq jáne turaqty damý máseleleri Prezıdent Nursultan Nazarbaevtyń erekshe nazarynda ekendigin atap ótip, ótkizilgen konferensııa buǵan dálel dep basa aıtty. Qazaqstan jáne onyń halyqaralyq seriktesteri Aýǵanstan jónindegi Astanalyq forýmnyń nátıjelerin júzege asyrýda birlesip áreket etedi. Osy turǵyda Almatyda BUU-nyń aımaqtyq habyn qurý múmkindigi qarastyryldy, ol óz kezeginde Astana konferensııasy barysynda talqylanǵan jobalardy úılestirý alańy bolmaq.
Taraptar Ortalyq Azııa memleketteriniń sońǵy jyldardaǵy kópjaqty yntymaqtastyǵynyń oń nátıjelerine qanaǵattanýshylyq bildirdi. Aǵymdaǵy jyly ótkizilgen Ortalyq Azııa elderi kóshbasshylarynyń konsýltatıvti jumys kezdesýi, Kaspıı teńizi jónindegi, Aral teńizin saqtaý jónindegi halyqaralyq qor jáne Túrki keńesi sammıtteri aımaqtaǵy áriptestikti nyǵaıtty jáne Ortalyq Azııa men kórshi óńirlermen ózara tıimdi saýda-ekonomıkalyq jáne mádenı-gýmanıtarlyq baılanystardy tereńdetýge jol ashty. Birikken Ulttar Uıymy óz tarapynan Qazaqstannyń BUU Qaýipsizdik Keńesindegi jumysyn qosa alǵanda, Ortalyq Azııanyń múddelerin ilgeriletý, beıbitshilik, qaýipsizdik jáne turaqty damý máseleleri jónindegi halyqaralyq bastamalaryna qoldaý bildirýde. Ortalyq Azııa halyqaralyq qoǵamdastyqta tabysty aımaqtyq yntymaqtastyqtyń úlgisi retinde qarastyrylady jáne Qazaqstannyń beıbitshilik úderisin qoldaý men óńirlik turaqtylyqty nyǵaıtý maqsatynda Aýǵanstandy óńirge ıntegrasııalaýǵa bastamashylyq etýi mańyzdy bolyp tabylady.
Aýǵanstan Syrtqy ister mınıstriniń orynbasary Adelıa Razben kezdesý barysynda eki el arasyndaǵy qarym-qatynastardy odan ári nyǵaıtýǵa múddeliligi atap ótildi, sondaı-aq saýda-ekonomıkalyq yntymaqtastyqtyń ósimi baıqalyp, 2017 jyly taýar aınalymy 564,7 mln. AQSh dollaryn qurady. Qazaqstan Aýǵanstanǵa ekonomıkalyq kómek kórsetý aıasynda óziniń halyqaralyq mindettemelerine beıildiligin bildirdi. Taraptar damýǵa resmı kómek kórsetý ulttyq júıesi sheńberinde aýqymdy jumystar júrgiziletindigin málimdedi.
A. Raz Qazaqstan tarapyna aımaqtyq konferensııany uıymdastyrǵany, sondaı-aq elimizdiń Aýǵanstan áıelderiniń máselelerine aýdaratyn nazary úshin alǵys bildirdi. «Biz Qazaqstannyń kómegin joǵary baǵalaımyz, bul bizdiń halqymyz úshin mańyzdy. Myńdaǵan aýǵan stýdentteri Qazaqstanda bilim aldy jáne qazirgi ýaqytta olar bar bilimderin jáne daǵdylaryn beıbit Aýǵanstandy qalyptastyrý úderisinde qoldanyp jatyr», - dep atap ótti aýǵan dıplomaty.
Aýǵanstannyń múddeleri BUU Qaýipsizdik Keńesindegi jumysynda qazaqstandyq tarappen eskerilýde.
Eki eldiń ózara árekettesýi AО́SShK, IYU, Birikken Ulttar Uıymynyń Esirtki jáne qylmys jónindegi basqarmasy, Ortalyq Azııa óńirlik aqparattyq úılestirý ortalyǵy sııaqty alańdarda óz jalǵasyn tabady.