Oral qalasynda «Depo kópiri» atalyp ketken temirjol ótkeli kúrdeli jóndeýden soń qaıta paıdalanýǵa berildi. Qurylysy eki jylǵa josparlanǵan nysan ýaqytynan buryn tapsyrylyp otyr.
Kóne gazet betterin paraqtasaq, Oral qalasynda 1960-1970 jyldary osyndaı ótkel kópirlerdiń salynýy úlken oqıǵa, qala damýynyń kórinisi retinde atalyp ótipti. Rasynda da oblys ortalyǵyn aıqysh-uıqysh kesip ótetin temirjol toraby avtokólik jolymen qıylyspaı, bir-birine kedergi keltirmeýi qaýipsizdik úshin de, ýaqyt utý úshin de qajetti shara ǵoı. Búginde iri megapolısterde baǵdarsham azaıyp, avtokólik joldarynyń ózi bir-birine kedergi keltirmeýi qatań qadaǵalanady.
Biz aıtyp otyrǵan Depo kóripi 1965 jyly salynǵan eken. Oral temirjol vokzalynyń dál irgesinde turǵan kúrdeli nysan. Astynan alty torap shoıyn jol ótetin kópir Oraldyń eń úlken eki aýdanyn bir-birine jalǵaıdy. Kúni-túni qoldanystan ábden tozyǵy jetken kópir sońǵy jyldary irgesi sógilip, symdary shyǵyp, sharshaǵany bilinip-aq júrgen edi. Qazirgi kólik tasqynynyń da nópiri bólek qoı. Kópirdiń kilt burylysynda jol-kólik oqıǵasy bolyp, kólik qulap ketken oqıǵalar da kezdesti.
Depo kópiri 2017 jyly 1 naýryzda jóndeýge jabyldy. Shynyn aıtý kerek, avtobýs marshrýttary ózgerip, aınalma joldarǵa salmaq túsip, oraldyqtar úshin óte qolaısyz jaǵdaı boldy. «Jóndeý jumysy eki jylǵa sozylady» degen habar da qıyn tıdi. Kópirdi kúrdeli jóndeý jumysymen «KA Stroı LTD» JShS aınalysty. «Qarashyǵanaq Petroleým Opereıtıng b.v" kompanııasy qarjylandyrǵan jumysty kúrdeli jóndeý degennen góri jańa nysan dese de bolady – óıtkeni burynǵy kópirdiń ornynda turǵany bolmasa túgelimen jańa qurylys. Uzyndyǵy 536 metrlik kópirdiń eni eki eseden artyq keńip, burynǵy eki jolaqtyń ornyna tórt jolaqty jol paıda boldy. Jaıaý adam júretin qosymsha soqpaq ta qarastyrylǵan.
Eki jylǵa josparlanǵan qurylys 17 aıda bitip, búgin «Qala kúni» merekesi aıasynda qaıta paıdalanýǵa berildi. Jańa kópirden alǵashqy bolyp ótken kólikter bul oqıǵaǵa erekshe shattanyp, kólik dabylyn basyp, azan-qazan, ý-shý toı boldy.
Qazbek QUTTYMURATULY,
«Egemen Qazaqstan»
Oral qalasy