Pragada ótip jatqan Ekonomıka jáne qorshaǵan orta forýmynyń ekinshi kúninde sıfrly dáýirde Qazaqstanda memlekettik qyzmet jáne sybaılas jemqorlyqqa qarsy kúres salasynda júzege asyrylyp jatqan keshendi reformalar týraly jan-jaqty aqparat usynyldy.
Qazaqstan Respýblıkasynyń Vena qalasyndaǵy halyqaralyq uıymdar janyndaǵy Turaqty О́kili – EQYU Ekonomıka jáne ekologııa komıtetiniń tóraǵasy Qaırat Sarybaı is-sharanyń sıfrlyq ekonomıka múmkindikterin paıdalaný maqsatynda barlyq úleskerlerdiń múddelerin ilgeriletý taqyrybyna arnalǵan sessııaǵa moderator retinde qatysty.
Sessııa barysynda tehnologııalar damyǵan kezeńde birlese jumys isteý, yntymaqtastyq jáne úılestirý jumystaryn qosa júrgizý, aqparat jáne baılanys salasynda bıznes konferensııa ótkizý jáne aqyldy qalalar men ýnıversıtetterdiń jelisin ornatý týraly usynys jasaldy. Bul óz kezeginde sıfrly dáýirde usynylatyn múmkindikterdi tıimdi paıdalaný ári atqarylyp jatqan jumystyń qaıtalanbaý maqsatynda mańyzdy bolǵanyna nazar aýdaryldy.
Sessııanyń pikirtalas bóliginde Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova forýmda kóterilgen ózekti taqyryptar boıynsha Qazaqstannyń tájirıbesin tanystyra kele agenttiktiń memlekettik qyzmetti damytý jáne kásibıligin arttyrý, adam kapıtalyn damytý, sıfrlandyrý men sybaılas jemqorlyqpen kúres baǵytynda atqaryp jatqan jumysy týraly maǵlumat berdi. Onyń ishide memlekettik apparattyń qyzmetin jetildirý, «E-qyzmet» aqparattyq júıesi arqyly kadrlyq qujat aınalymyn elektrondyq júıege kóshirý, qosalqy memlekettik qyzmet kórsetý mekemeleriniń ortalyqtandyrylýy jáne avtomattandyrylýy men ınvestorlardy qorǵaý jobasynyń júzege asyrylýyna nazar aýdardy. О́zekti taqyryptardyń biri retinde Qazaqstanda eńbekaqyny tóleýdiń jańa júıesi týraly aqparat usynyldy.
«Talap» qoldanbaly zertteý ortalyǵynyń dırektory Rahym Oshaqbaev «Sıfrlyq dáýirde ınnovasııalyq bıznes modelderi men ekonomıkalyq ózara baılanystyqty ilgeriletý» taqyrybyna arnalǵan sessııada spıker retinde qatysyp «Bes ınstıtýsıonaldyq reformanyń» sheńberinde Qazaqstannyń ekonomıkalyq damýy men adam kapıtalyn jetildirý jóninde ortalyqtyń jumysy týraly aqparat usyndy. Sonymen birge, elektrondyq úkimet arqyly memlekettiń ashyqtyǵyn qamtamasyz etý taqyryby boıynsha Qazaqstannyń tájirıbesimen jáne Qazaqstandaǵy ınnovasııalyq bıznesti damytý tetikteri týraly oılarymen bólisti.