Almatyda «Astana» alańynda qala ákimdigi men «Baurzhan Foundation» jeke qorynyń uıymdastyrýymen ótken «KITAP FEST 2018» halyqaralyq kitap festıvali aıasynda kitapsúıer qaýym jańa avtorlarmen tanysý múmkindigine ıe boldy.
Buqara arasynda kitap oqý mádenıetin damytyp, otandyq qalamgerler shyǵarmalaryn nasıhattaýdy maqsat etetin mádenı sharaǵa elimizge tanymal tulǵalar, blogerler men BAQ ókilderi qatysty.
Festıval alańynda otyzǵa jýyq baspa jáne kitap dúkenderi óz ónimderin usyndy. Al kitap merekesiniń mańyzdy bóligi ári kitap oqyrmandaryna jeke kitaphanasyndaǵy kitaptarymen almasýǵa múmkindik beretin IBOOKYOUSWAP aıasynda bes myńdaı kitap jınaldy.
«Jazýshylar shańyraǵynda» kórme qonaqtary Oleg Chervınskıı, Hakım Býlıbekov, Jan Amany, Natalıa Mahno, Almaz Sharman jáne t.b. avtorlardyń jańa kitaptarymen tanysyp, «Kitap Offlaın» bóliminde tanymal tulǵalar jáne jýrnalıstermen kezdesti, sondaı-aq ózderin qyzyqtyrǵan suraqtarǵa jaýap aldy. Al «Arýna» baspa úıi balalarǵa arnalǵan «Kitaptar qalaı paıda bolady?» degen taqyrypqa oıyn-saýyq baǵdarlamasyn usyndy.
Demalys kúnine oraılastyrylyp ótkizilgen mádenı sharada barysynda qala turǵyndary men qonaqtary erekshe kóńil-kúıde boldy.
Elvıra Serikqyzy,
«Egemen Qazaqstan»
ALMATY