«Nur Otan» partııasy Almaty qalalyq fılıalynyń XXII esep berý saılaý konferensııasy ótti. Osy jıyn barysynda sońǵy eki jylda atqarylǵan jumys talqylanyp, alǵa qoıylǵan maqsattar men mindetter jaıynda keńinen áńgime qozǵaldy.
Konferensııada alǵashqy bolyp sóz alǵan partııanyń fılıal basshysy, Almaty qalasynyń ákimi Baýyrjan Baıbek baıandama jasap, 2017 jáne 2018 jyldary atqarylǵan sharýalar jaıynda esep berdi. Rasynda da «Nur Otannyń» bastamasymen Alataý bókterinde ornalasqan ásem shaharda biraz aýqymdy jumystar atqarylǵan eken. Atap aıtsaq, qala kóshelerinde kúrdeli qurlystar men jańǵyrtý jumystary qarqyndy túrde júrgizilýde; jol aıyryqtar iske qosylýda; jer asty joldary jańa keıipke enýde; talaı turǵyn úı boı kóterip, jastar úshin sol páterler 5 paıyzdyq jeńildik nesıemen berilýde; «Almatyny damytýdyń 50 jobalar-draıverleri» bastamasy sheńberinde 180 mıllıard teńge somasyna 41 joba iske asyrylýda; Almaty halyqaralyq áýejaıy jańǵyrtylýda; avtobýs parki 30 paıyzǵa jańartylyp, 500 avtobýs satylyp alyndy; qazirgi kezde 2 jańa metro stansııasynyń qurylysy júrgizilýde...
Osylaı tizbekteı bersek, Almatyda kóptegen ońdy ister atqarylyp jatqanyna anyq kóz jetkizýge bolady. Ásem shaharymyzdy kórkeıtý maqsatynda áli de tyndyrylýǵa tıis sharýalar jeterlik. Bul rette de jumys qarqyndy júrgizilýde. Osynyń barlyǵy da Elbasy Nursultan Nazarbaevtyń Qazaqstannyń álemdegi eń damyǵan 30 memlekettiń qataryna kirý jónindegi jańa strategııalyq maqsatyn júzege asyrýǵa baǵyttalǵan ıgi sharalar, – deıdi Baýyrjan Baıbek.
«Nur Otan» partııasy memleket aýqymdaǵy mańyzdy strategııalyq mindetterdi sheshýmen qatar, árdaıym qarapaıym adamdardyń problemalaryna da kóp kóńil bólýde. Bir ǵana mysaly, sońǵy eki jyl ishinde Almaty qalalyq partııa fılıalynyń qoǵamdyq qabyldaý bólmesine 14 myńnan asa azamattyń ótinishi kelip tústi. Solardyń úshten biriniń sheshimi tabylyp, qalǵandaryna konsýltasııalyq kómek kórsetilip, túsiniktemeler berildi.
Konferensııa barysynda Almaty qalalyq fılıaly Saıası keńesi men Baqylaý tekserý komısııasynyń músheleri saılanyp, «Nur Otan» partııasynan Almaty qalasy máslıhatynyń depýtattyǵyna úmitkerler usynyldy. Sonymen qatar, «Kópshilik aldynda sóıleý sheberligi», «Jańa buqaralyq aqparat quraldaryndaǵy jumys tehnologııalary» jáne «Kásipkerlikti damytý» taqyrybynda semınar-trenıng ótti.
Ǵalym SÚLEIMEN,
«Egemen Qazaqstan»