Almatylyq qolóner sheberleri megapolıstiń týǵan kúnine arnap tamasha tartý jasady. Ejelden tigin óneri men zergerliktiń ordasy sanalǵan alyp shaharda uzyndyǵy 10 900 metr bolatyn quraq kórpe tigildi. Qala kúnin merekeleý aıasynda Tuńǵysh Prezıdent saıabaǵyna jaǵalaı tóselgen ádemi naqyshtaǵy ásem kórpeni 200 sheber bes aı boıy tikken. Halqymyzdyń baı dástúri men ulttyq ónerin tanytatyn qolóner týyndysyna tańdanbaý múmkin emes. Quraq kórpe túrli qanyq tústermen kómkerilip, qazaqy oıý-órnektermen bederlengen.
Tókken ter men tynymsyz eńbek aqtalyp, qolóner týyndysy Jer sharyndaǵy eń uzyn quraq kórpe retinde Gınnestiń álemdik rekordtar kitabyna enip otyr. Álemdegi eń uzyn kórpeni bul tizimge kirgizý úshin onyń sapasyn tekserýge arnaıy kelgen «Gınnes rekordtar kitaby» bas keńsesiniń ókili Djona Brent has sheberlerdiń ujymdyq eńbegin joǵary baǵalady. «Qazaqstandyq quraq kórpeni kórip, baǵasyn berý úshin qala kúni merekesine arnaıy keldik. Bul shynymen de tańqalarlyq dúnıe eken. Muny dáleldeıtin resmı qujatty da tabystap otyrmyz. Endi quraq kórpe tigýden álemdik rekord jańardy. Tabandylyqtary men erekshe ónerleri úshin qazaq sheberlerine aıtar alǵysymyz zor», deıdi ol.
Mereke aıasynda dámi tatqan jannyń tańdaıynda qalatyn almaty almasynyń túr-túri qoıylǵan almalar jármeńkesi de sheteldik qonaqtardy tánti etti. Jergilikti dıqandar qala kúnine arnap 100 tonna tátti jemis ákelgen. Eske salsaq, almanyń otany Almatynyń 1002 jyldyǵy qala kóleminde keńinen atalyp ótken bolatyn.
Arman OKTIаBR,
«Egemen Qazaqstan»
ALMATY