Astanada Vetnam Sosıalıstik Respýblıkasynyń qurylǵanyna 73 jyl tolýyna oraı alqaly jıyn ótti. Shara barysynda Vetnam men Qazaqstan arasyndaǵy dostyqqa zor úles qosqan otandastarmyz marapattaldy. Olardyń qatarynda Grıgorıı Shıshov, belgili qazaqstandyq qaıyrymdylyq qyzmetshisi, professor Oralbek Botbaı jáne Baqyt Rústemov bar. Sonymen qatar shet elderdiń elshileri de qatysty.
Jıynda Vetnam Sosıalıstik Respýblıkasynyń Qazaqstandaǵy Elshisi Doan Thı Sýan Hıen osydan 73 jyl buryn 2 qyrkúıekte, vetnam halqynyń súıikti kóshbasshysy, Prezıdent Ho Shı Mın, Ha-Noı Ba-Dın alańynda Táýelsizdik Deklarasııasyn oqyp bergenin jáne bul kún Vetnam Demokratııalyq Respýblıkasynyń, qazirgi Vetnam Sosıalıstik Respýblıkasynyń qurylǵan kúni bolyp belgilengenin tilge tıek etti.
«Sol ýaqyttan beri batyr jáne qaısar vetnam halqy kóptegen qıyndyqtar men aýyrtpalyqtardy jeńý úshin, bizdiń ulttyq qaıta qosylýymyzdy, táýelsizdigimiz ben bostandyǵymyzdy saqtap qalý úshin basyn biriktirdi, aýqatty halyq, qýatty ult bolýǵa, demokratııalyq, ádil jáne órkenıetti qoǵam qurýǵa umtyldy. Qazirgi kezde Vetnam senimdi dos jáne seriktes, sondaı-aq halyqaralyq qaýymdastyqtyń jaýapty múshesi bola otyryp, aımaqtyń jáne álemniń yntymaqtastyǵy men damýy, beıbitshilik múddesi úshin táýelsizdik, ózin-ózi qamtý, óziniń syrtqy baılanystaryn ártaraptandyrý jáne jan-jaqty qoldaý boıynsha júıeli syrtqy saıasatyn júrgizýdi jalǵastyrýda».
«Sonymen qatar men Qazaqstan Respýblıkasy jáne onyń halqyna ulttyq deńgeıde damýymyz kezinde kórsetken zor qoldaýlary men yntymaqtastyqtary úshin alǵys aıtqym keledi. 26 jyldyq dıplomatııalyq qarym-qatynasy bar Vetnam men Qazaqstan dostyq dástúr negizinde aramyzdaǵy jyly dostyq qatynas pen yntymaqtastyqty ári qaraı nyǵaıtady. Sońǵy jyldary eki eldiń arasyndaǵy kóp qyrly yntymaqtastyq turaqty nyǵaıyp, damýda. Osy jyldarda eki el de barlyq deńgeılerde delegasııalarmen almasty, ásirese Prezıdent Nursultan Nazarbaevtyń 2011 jyly Hanoıǵa resmı saparyn, prezıdent Chyong Tan Shangtyń 2012 jyly Astanaǵa memlekettik saparyn jáne Vetnamnyń Ulttyq jınalysynyń Prezıdenti Ngýen Thı Kım Ngannyń 2017 jyly Qazaqstanǵa resmı saparyn erekshe ataý kerek. Osy saparlar barysynda túrli salalardaǵy seriktestik týraly birqatar mańyzdy qujattarǵa qol qoıyldy. Vetnam jáne Qazaqstan arasyndaǵy ekonomıkalyq, saýda jáne ǵylymı-tehnıkalyq seriktestik salasyndaǵy yntymaqtastyq tetigin qoldaı otyryp, biz eki el de saýda-ekonomıkalyq baılanystardy nyǵaıtý jáne erkin saýda týraly Kelisimdi tıimdi júzege asyrý boıynsha is-qımyldardyń birlesken josparlaryn ázirleıtin bolady dep úmittenemiz. Eki el jan-jaqty saıası dıalogty jáne barlyq salalardaǵy yntymaqtastyqty damytý kelesheginiń keń sheńberin naqty kózdeıdi», dedi ol.
Sonymen qatar mańyzdy máslıhatta Qazaqstan Respýblıkasy Syrtqy ister mınıstriniń orynbasary Ǵalymjan Qoıshybaev Qazaqstan Respýblıkasy men Vetnam Sosıalıstik Respýblıkasy arasyndaǵy dıplomatııalyq qatynastardyń ornaǵanyna jıyrma alty jyl tolǵanyn atap ótip, osy jyldar ishinde ekijaqty yntymaqtastyq negizgi sıpatqa ıe bolǵanyn, Vetnammen ekonomıkalyq yntymaqtastyqty damytý máselesi Qazaqstannyń syrtqy saıasatynda mańyzdy oryn alatynyn ortaǵa saldy.
«Biz Vetnammen aımaqaralyq yntymaqtastyqty damytýǵa úlken mán beremiz. Aǵymdaǵy jyldyń sońyna deıin qazaqstandyq jáne vetnamdyq delegasııalardyń josparlanǵan saparlary ózara saýda-sattyqtyń ósýine, eki el arasyndaǵy ekonomıkalyq jáne ınvestısııalyq baılanystardy keńeıtýge oń yqpal etetinine senimdimin», dedi Ǵ.Qoıshybaev
Raýan QAIDAR,
«Egemen Qazaqstan»