Bıyl aqyn Sara Tastanbekqyzynyń týylǵanyna 165 jyl toldy. Aıtys óneriniń aqtańgeri atanǵan halyqtyń qadirli qyzyna degen qurmet esh kemigen emes.
Aqynnyń kindik qany tamǵan Aqsý óńiri Saranyń toıyn «Rýhanı jańǵyrý» baǵdarlamasy aıasynda atap ótýdi bastady. Kúni keshe Jansúgirov kentinde «Jetisýdyń Sarasy – bar qazaqtyń darasy» atty respýblıkalyq aıtys ótti. Aıtysqa Balǵynbek Imashev, Aınur Tursynbaev, Sara Toqtamysova, Jandarbek Bulǵaqov sııaqty sýyryp salma ónerdiń ókilderi kelip, Aqsý aspanyn áýezdi áýen, utymdy uıqasqa bóledi.
Sóz saıysynyń nátıjesinde bas júlde dúldil aqyn Jandarbek Bulǵaqovqa buıyryp, ol 1 500 000 teńge aqshalaı syıaqyny qanjyǵasyna baılady. Al Sara Toqtamysova birinshi, Balǵynbek Imashev ekinshi, Syrym Áýezhan men Muradym Mırlanov úshinshi júldeli oryndardy ıelendi. Aqsý aýdany ákiminiń arnaıy júldesine Jetisýdyń jas aqyny Jalǵas Sadyruly laıyqty boldy. Sondaı-aq, Aınur Tursynbaeva, Qýanysh Sharmonov, Nurıslam Ábdil, Jarqynbek Naýshabekovter de aıtystan quraýyz qaıtpaı, yntalandyrý júldelerin alyp qaıtty.
- Bıyl aıtystyń dara dúldili Sara Tastanbekqyzynyń 165 jyldyǵy oblys kóleminde atalyp ótýde. Búgingi Jansúgirov kentinde ótken «Jetisýdyń Sarasy – bar qazaqtyń darasy» atty respýblıkalyq aıtys sonyń bir kórinisi. Buǵan deıin aqynnyń Máskeýden tabylǵan sýretteri, jeke zattary elge ákelingen bolatyn. Aqyn Saraǵa degen el qurmeti arta beredi, - deıdi Almaty oblysy ákiminiń orynbasary Aqan Ábdýálıev.
Aıtpaqshy, aýdan ortalyǵynda ótken sharada «Birjan - Sara» operasynan teatrlandyrylǵan úzindi qoıylylyp, basty rólderdi Qazaqstan Respýblıkasynyń eńbek sińirgen qaıratkeri, akter Saǵat Jylkeldıev pen Qazaqstannyń mádenıet qaıratkeri, ánshi Gúlmaıdan Súndetova somdady.
Qalmahanbet MUQAMETQALI,
«Egemen Qazaqstan»
Almaty oblysy