Keshe Memlekettik hatshy Qanat Saýdabaev WBA tujyrymy boıynsha kásipqoı bokstan orta salmaqtaǵy álem chempıony Gennadıı Golovkınge «Parasat» ordenin tabys etti.
Kezdesýde boksshy elimiz Táýelsizdiginiń 20 jyldyǵynda memleket tarapynan orden alǵanyna razylyǵyn bildirip, bul marapat ózi sııaqty elimizden syrtqary jerlerde, el namysyn qorǵap júrgen sańlaqtarymyz úshin aýyzben aıtyp jetkizgisiz úlken qýanysh ekenin, osy nagradany ol maqtan tutyp, elimizdiń kók baıraǵyn bıikte jelbiretý úshin aıanbaı ter tógetinin atap ótti.
Memlekettik hatshynyń qabyldaýynan soń, G.Golovkın óziniń aldaǵy josparlary týraly oılarymen bólisti. «Qazirde meniń kásipqoı boksta eki tujyrym boıynsha álem chempıony ataǵym bar. Kelesi jyly álem chempıony ataǵyn qorǵaý úshin jekpe-jekter ótkizýdi josparlap otyrmyn. Ol úshin kelissózder júrgizip jatyrmyz», dedi ol. Osy rette dańqty boksshy shet elde turyp, sol jaqtyń aýasyn jutyp júrse de sharshy alańǵa shyqqan saıyn júreginiń Qazaqstan dep soǵatynyn, qaı kezde bolsa da elimizdiń kók týyn kóterý úshin kez kelgen qarsylasymen aıqasatynyn jetkizdi.
«Aldaǵy jekpe-jekterdi AQSh-tyń Las-Vegas qalasynda ótkizemin. Bul jerde eki tujyrym boıynsha belbeýlerimdi qorǵaımyn. Sonyń biri – sýper chempıon Felıks Shtýrm bolsa, ekinshisi – amerıkalyq chempıon. Solardyń qaısysy usynysymdy birinshi qabyldasa, sonymen kezdesemin», dedi boksshy. Sóziniń sońynda G.Golovkın kásipqoı boksta qolǵabyn shegege ilgen soń, shet elde qalmaı, Qazaqstanǵa kelip, otandyq boksty damytý úshin jumys isteıtinin aıtty.
G.Golovkın buǵan deıin 22 kezdesý ótkizip, sonyń 19-ynda qarsylastaryn nokaýtpen, qalǵan úsh jekpe-jekte upaı sanymen jeńgen. Sonyń ishinde bıyl Panamada Kassım Oýma men amerıkalyq Lahýan Saýmon ekeýin nokaýtqa jiberip, ataǵyn qorǵap qaldy.
«Parasat» ordeni boksshynyń alǵashqy ordeni emes. Buǵan deıin ol Olımpıadanyń kúmis júldegeri atanǵanda memleket tarapynan «Qurmet» ordenimen jáne basqa da medaldarmen marapattalǵan bolatyn.
Dastan KENJALIN.