Qazaqstannyń birinshi raketkasy Iýlııa Pýtınseva Áıelder tennısi qaýymdastyǵynyń (WTA) jańartylǵan reıtınginde 45-orynǵa kóterildi, dep habarlaıdy sports.kz.
Osyǵan deıin 61-orynda bolǵan qazaqstandyq tennısshi birden 16 satyǵa joǵarylady. Iýlııa Pýtınsevanyń reıtıngte osylaısha joǵarylaýyna onyń ótken senbi kúni Qytaıda márege jetken Gýanchjoý týrnırinde sátti óner kórsetýi sebep boldy. Júlde qory 250 myń AQSh dollaryna baǵalanǵan aıtýly jarysta qazaqstandyq tennısshi fınalǵa deıin jetip, sońǵy básekede utylyp qaldy. Taǵy bir qazaqstandyq tennısshi Zarına Dııas 94-ten 92-orynǵa shyqty. Juptyq synda Galına Voskoboeva 89-dan 84-satyǵa joǵarylady. Erler arasyndaǵy reıtıngte Mıhaıl Kýkýshkın óz ornyn ózgertken joq. Sol 87-satyda qaldy. Reıtıngtiń alǵashqy úshtigi sol kúıi ózgerissiz. Bul tizimde rýmynııalyq Sımona Halep, danııalyq Karolın Voznıaskı jáne Germanııa raketkasy Anjelık Kerber bar.